San Pra ai Ephrem a Poi Nhtoi (June 9) 09 June 2023

San Pra ai Ephrem a Poi Nhtoi (June 9)

San Pra ai Ephrem gaw, Nawku Hpung a nnan daw na mahkawn mangoi hte seng nna grai ning tawn dik ai wa rai nga ai. Shi gaw, Madu a shaning (306) ning hta Syrian Mungdan, Nisibis Mare kaw shangai chyinghkai wa ai rai nga ai. Shi a asak (18) ning du ai shaloi, kashin kamun hkam la ai majaw, Shi a Kanu yan Kawa gaw, shi hpe nta kaw na gawt shapraw kau ma ai. Dai shaloi, shi gaw, Nisibis Mare na, San Pra ai Wa Saradaw Jacob (Yaku) a hpang hkan tai nna, A.D (325) ning hta Nicea Mare kaw galaw ai Nawku Hpung a Zuphpawng kaba hta sa du shang lawm wu ai.

A.D (350) ning hta Persia amyu sha ni Nisibis Mare hpe jahten mazing la kau ai shaloi, Ephrem gaw, Edess mare makau na bum kaw tara sa shadik let nga mat nu ai. Shi gaw, aten tup amu galaw ai hte akyu hpyi nna nga nga wu ai. Dai hta n-ga, Wenyi hte seng ai laika ni, Chyum Mungga hte seng ai laika buk ni malawng maga hpe dai bum kaw nga ai aten, ka kau da ai rai nga ai. Bai nna, Deacon Ephrem gaw, Nawku Hpung Daw Jau Lamang hta lang ai Mahkawn ga ni hpe mung ka shalat da ya lai wa sai rai nga ai. Dai majaw, Shi hpe Nawku Hpung gaw, “Chyoi Pra ai Wenyi a Dawraw Tingse” (The Harp of the Holy Spirit) nga nna shamying shing teng jaw shagrau da nga ai.

San Pra ai Ephrem gaw, shagrit shanem ai myit a majaw, Jau aya hpe n hkam la ai sha, Deacon aya sha hkam la wu ai. Shi gaw, Edessa mare kaw, tara hkaw shabra ai, Nawku Hpung a makam masham hte seng nna n teng man ai hku sharin ai ni hpe gwi gwi ning hkap lai wa sai rai nga ai. A.D (373) ning hta Edessa Mare ting hku wa kaba hte hkrum ma ai. Dai shaloi, Deacon Ephrem gaw, pu ai ba ai n nga ai sha, aten tup jam jau hkrum ai ni hpe galaw daw jau wu ai. Dai zawn rai, n hkring n sa grai shakut lai wa ai majaw, Edessa Mare kaw nna, Shi nga ai bum na lunghkrung kata de bai du ai shata mi sha naw rai yang, June shata (9) ya shani hta, Madu kaw yup pyaw ban sa mat wa sai rai nga ai.

Deacon Ephrem n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, June shata (9) ya shani ngu masat shagrau dat ya sai rai nga ai.

Daini Nawku Hpung gaw, Newminster Mare na, San Pra ai Deacon Ephrem a Poi Nhtoi hpe galaw nga ga ai aten hta, anhte Hpung masha ni mung, Deacon Ephrem zawn, tinang lu da ai shing gyim asak aprat hpe atsawm sha akyu jashawn jai lang lu ai ni byin tai lu hkra shakut sa wa nga ga law.  

By;

Sister Rose Angeline Maran Nang Doi (SFX)

RVA-Kachin Service (Myitkyina)