San Pra ai Elizabeth a lam (16 July, 2019 )

San Pra ai Elizabeth.

          Nu wa hpu nau ni, San Pra ai Elizabeth gaw, Hungary Hkawhkam a shayi sha rai nga ai. Hkawhkam kasha re ai hta sha n ga, kaji ten kawn gawng shingyan tsawm ai hte yawng yawng grai tsawra  ai ma mung rai nga ai. Shingrai, Elizabeth asak (4) ning sha naw re ai ten kawn Du kasha  Ludwig ngu ai shadang sha a matu, hpyi shawn mahtan da ma ai lam chye lu ai. Dai majaw, grai naw kaji ai ten kawn nna, Elizabeth gaw, kanu kawa ni hte hka nna, dai Hkawhkam wang kata kaw nga kaba ra mat sai. Ya na zawn dai hkawhkam wang kaw nga let, machye machyang hpaji ni hpe sharin la nhtawm me, shi a asak (14) ning du ai ten, Hkungran poi galaw ya manu ai. Mayu dauma lahkawng maga na ni, Hkawhkam amyu ni re majaw, shan a hkungran poi hpe hkyik hkam ai hte galaw ya sai rai nga ai. Dinghku shang hkungran poi ngut ai hpang, Elizabeth gaw, shi lu ai ja gumhpraw ni hte tsi rung kaba langai mi gap nna, dai tsi rung hpe yu woi awn nga nu ai. Tsi rung she rai tim, madung da tsi tsi ya ai gaw, mang gang kap ai ni hpe tsi gawn lajang ai tsi rung rai nga ai. Mau hpa langai gaw, Elizabeth shi hkum nan, dai mang gang kap ai masha ni hpe gawn lajang, tsi lajang ya ai lam rai nga ai.

          Bai nna, shi a ningrum ningtau wa hkawm ai ten ni hta mung, Elizabeth gaw shi a hkawhkam hkring nlang ai sha, ntsawm ai hpun palawng ni hpun nna, machyi ai ni hpe yu lajang hkawm rai nga ai. Dai majaw, shi a madu wa gaw kalang lang masin pawt wa ai lam chye lu ai. Raitim, Elizabeth galaw ai amu hpe Madu Karai Kasang ra sharawng ai magam re majaw, shi hpe lamik kumla madun dan sai. Ganing re ai lamik kumla ni rai ta nga jang, lani mi hta, Elizabeth gaw manggang nna hpye ai masha hpe shan a yup ra kaw wa tawn da nna gawn lajang nga nu ai. Daizawn hkawhkam hkaw kata na shan a yup ra ntsa kaw manggang kap ai masha hpe tawn da ai, ngu ai gaw, nhtuk manu ai bungli, nmai galaw ai rai nga ai. Dai majaw, Elizabeth a kamoi, daizawn byin ai hpe nra sharawng ai majaw, shi a kasha hpe tsun dan nu ai. Shing rai, Elizabeth a ningrum ningtau wa hte shi a kamoi sa yu ai shaloi, dai manggang kap ai masha gaw, Ma Yesu mani sum sai rai taw nga ai hpe wa mu ma ai da. Dai majaw, grai mau mat masai. Bai nna, lani mi hta mung, Elizabeth gaw, shi tsi rung kaw nga ai manggang kap ai ni hpe jaw sha na matu malu masha ni htaw wa ai shaloi, nmyit mada ai sha, lam ntsa kaw shi a ningrung ningtau wa hte hkrum nu ai. Shaloi shi a madu wa, Elizabeth hpe nang hpa ni gun wa nta? Hkawhkam jan she re wa, hpa na daizawn rai gun hkawm ai gaw? Yu yu ga ngu, tsun dat nu ai. Shaloi Elizabeth gaw, hpa nre ngu, tsun let, n jaw yu ai da.

          Shingrai, shi madu wa, Elizabeth gun da ai ka hpe kashun la nna hpaw yu dat ai shaloi, malu masha ngu gun wa ai arai ni yawng, grai tsawm nna, sama hawm ai nam pan pu ni byin taw ai da e. Dai shaloi mung kalang, Elizabeth a madu wa grai mau mat nu ai. Dai shani kaw nna, madu jan Elizabeth a magam bungli lam hta pat hkum ai lam n nga ai sha ahkaw ahkang jaw ya sai rai nga ai. Ya na zawn Elizabeth a chyoi pra san seng ai myit masin hte manggang kap ai ni hpe Madu Yesu a myi man tau let atsawm sha gawn, tsi lajang ya ai majaw, shi magam bungli ni grau grau nna awng dang wa sai. Mungdan ting na masha ni mung Elizabeth a shawang tsawra myit dam lada ai hpe yawng gaw, kabu awng sharawng nga ma ai. Hkawhkam hkawseng kata hta mung grai pyaw let myit hkrum myit ra rai woi zinlum nga ai lam labau hta matsing da nga mali ai re. Nu wa ni, moi prat ten hta, mungdan langai hte langai majan gasat ai lam law law rai nga ai. Shingrai, madu a shaning (1227) ning hta Elizabeth a madu wa majan gasat sa ai ten majan hta hkrat sum mat sai. Ndai zawn majan hta hkrat sum mat ai lam hpe kanau ngu na wa, chye dat nu ai. Dai majaw, Hkaw hpe shi kashun la na matu, garat shannu ni hpe hkawhkawm hkaw kawn gawt kau nu ai. Elizabeth gaw, madu wa majan hta hkrat sum mat nna, yawn hkyen kaba hkrum nga ai hta, karat ngu na wa e mung, gawt kau ai re majaw, grai myit ru tsam pu let, yawnhkyen nga nu ai.

          Elizabeth gaw, ya na zawn gawt hkrum ai raitim, matai htang na myit tsep kawp n nga ai sha n ga, nju ndawng ai ga si hpa mung ntsun ai sha, shannu ni dai hkawhkam hkaw kawn nna pru mat wa masai rai nga ai. Elizabeth gaw, moi asak (4) ning sha naw re ai kawn dai hkawhkam hkaw de sa tawn da kau hkrum ai re majaw, gara de mung nchye sa mat rai, hpang jahtum shi a kayung ni hpang de wa nna, kasha (3) hpe dai kaw tawn da nu ai. Elizabeth gaw, kasha ni hpe kayung ni kaw tawn da ai ten (4) ning tup akyu hpyi shaja let, kaja ai magam bungli ni hpe sha shakut nga ai lam shi a labau hta ka matsing da ai hpe chye lu ai. Nu wa ni, kaja ai myit masin hte Madu Yesu a myi man tau let shakut shaja ai wa gadai mung, lani mi na nhtoi hta lak lai ai shaman chyeju ni hpe hkam la lu na gaw teng sha rai nga ai. San Pra ai Elizabeth mung, shi a prat hkrun lam hta, manang wa a matu, kaja ai hku sha sak hkrung ya ai hpe adan sha mu mada lu nga ga ai re. Shingrai, madu a shaning (1231) ning shi a asak (24) ning hta, Marburg mare kaw Chyoi Pra ai hku si mat wa sai rai nga ai.  Shi a poi nhtoi hpe Chyoi Pra ai Kahtawlik Nawku hpung kawn nna, November shata (17) ya shani ngu masat da ya sai rai nga ai. Nu wa ni, San Pra ai Elizabeth a kasi hpe la let, anhte nang ngai yawng mung, matsan mayen re ai, gabai kau hkrum ai ni, tsi lajang na nmai byin mat sai ni hpe Madu Karai Kasang a myi man tau let, garum shingtau, tsawra myit madun ya nga ga ngu, n gun jaw mayu n ngai. Shingrai, November shata (17) ya shani du shagu, San Pra ai Elizabeth kaw lak lai ai shaman chyeju ni hpe hpyi la nga ga ngu, n gun jaw let, hpyi shawn da ai lamang hpe ndai kaw naw jahkring sai rai.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.