San Pra ai Elizabeth hte Zahkari Yan a Poi Nhtoi (November 5) 05 November 2023

San Pra ai Elizabeth hte Zahkari Yan a Poi Nhtoi (November 5)

San Pra ai Elizabeth hte Shi a Ningrum Ningtau Wa Zahkari yan gaw, Karai Kasang lak san lajang ya ai majaw, Yawhan Baptista a kanu yan kawa tai wa masai rai nga ai. Shing gyim masha ni hpe hkye hkrang la ai magam hta shan gaw, ahkyak kaba shara kaw lawm nga ai re. Karai Kasang a myit ra hpe hkan shatup nna, shan a myit mang yaw shada ai lam hpe Madu Karai Kasang Wa kaw adan aleng rai madun ai myit jasat hpe Nawku Hpung masha shagu kasi la mai nga ga ai. Madu Karai Wa hpe kam hpa myit hte sak hkrung nga ra ai kasi madun ai San Pra ai kanu yan kawa mung rai nga ma ai.

Shan lahkawng gaw, Tsa ban (1) hta sak hkrung nga lai wa ma ai. Zahkari gaw, Ga Shaka Dingsa ten hta Hkinjawng rai nga ai. Elizabeth gaw, arun a aru arat kaw na rai nga ai. Shan gaw, kun dinghku de ai shaning grai na wa timung, kashu kasha n lu ma ai. Lani mi hta Madu a Lamu Kasa Langai mi Zahkari kaw dan pru nhtawm, shi a Madu Jan Elizabeth gaw shadang sha shangai wa na hte Shi a mying hpe Yawhan ngu nna, shing teng amying jaw ya na re lam, tau nau sa tsun ai.

Madu Yesu a Kanu Chyoi Pra ai Nu Maria gaw, Yawhan Baptista hte Hkritung kata kaw naw gun nga ai, shi a Lawu lahta Kana Elizabeth hpang de, sa du gawan lai wa ai. Elizabeth gaw, nhtoi gu nna, shadang sha shangai wu ai. Htingbu ni, jinghku ni gaw, Madu Karai, shi hpe chyeju chyalai jaw sai lam, na jang, shan hte rau jawm kabu nga ma ai. Matsat ya du jang, ma hpe matu kadoi ma ai hte, kawa zawn, Zakari, ngu mying jaw mayu ma ai. Kanu Mahtang n hkraw nna, shi a mying Yawhan, rai lu ai, nga ai. Shanhte gaw, Na a baw sang ni hta shing nga ai mying langai mi mung n nga ai, ngu nna shi hpe tsun mu ai. Shaloi kawa hpe dingsi shaga nna, ma hpe kaning ngu shamying mayu ai lam san ma ai. Shi lungpa langai hpyi la nna, Shi a mying Yawhan, rai lu ai, ngu ka ya wu ai. Shanhte nlang mau mat ma ai. Dai jahkring mi na ai hte Zahkari gaw, n gup hpaw wa ai hte shinglet yan wa nna, “Israela a Madu Karai Kasang gaw, Shi a amyu sha ni hpe sa du gawan nhtawm, hkye mawai la sai majaw, Madu gaw a nga u ga law.” nga nna Karai Kasang hpe chyeju dum shakawn ai ga hkaw ni lawm ai, “Benedictus” Karai Kasang hpe shagrau sha a ga tsun wu ai.  Dai ga na la jang, Htingbu manang ni yawng hkrit kahpra wa ma ai. Dai Shiga gaw, Yuda bum ga ting pri rai wa sai. Dai na la ai ni yawng mung, na myit mau let, ndai ma hpa she rai wa na ra ai kun? nga nna shada da tsun hkat ma ai. Dai Ma hta Madu a dagu rawng nga ai gaw dan nga ai hte hkum hkrang wenyi hta kup tsup let galu kaba wa ai. Yawhan Baptista gaw, Nam mali de sha nga nga nna, aten du jang, Israela masha shawa kaw du pru wa sai.

San Pra ai Zahkari gaw, shi a Kasha Yawhan Baptista tara hkaw hkawm wa ai aten hta gara shara kaw nga ai lam, Herod Hkawhkam san sagawn ai shaloi, n tsun dan ai majaw, Nawku Jawng kata kaw nan Herod Hkawhkam a shangun ma ni a lata hta sat kau hkrum lai wa sai. San Pra ai Elizabeth chyawm gaw, asak grai kaba ai hpang she n nga mat wa sai rai nga ai. 

Nawku Hpung kawn, San Pra ai Elizabeth hte Zahkari Yan a Poi Nhtoi hpe, Shaning shagu November shata (5) ya shani masat shagrau galaw ya nga gai re.

Daini Nawku Hpung gaw, San Pra ai Elizabeth hte Zahkari Yan a Poi Nhtoi hpe galaw nga ga ai aten, byin mayu ai hte ra sharawng ai lam ni hpe kaja wa kam sham myit majing hte Karai Kasang Wa hpang de hpyi ai rai jang, teng sha lu la ai hpe mu lu nga ga ai re. Dai majaw, anhte prat hta mung, tinang ra sharawng ai, byin mayu ai hte ra kadawn nga ai lam ni hpe, Karai Kasang Wa hpang de kam sham myit majing hte akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)