San Pra ai Elizabeth Ann Seton a Poi Nhtoi (January 4)

San Pra ai Elizabeth Ann Seton gaw, American amyu sha ni kaw nna shawng n nan San Pra ai masha masat da hkrum ai amyu shayi rai nga ai. Shi gaw, lai wa sai 1774 ning, August shata (28) ya shani hta American Mungdan, New York mare kaw shangai chyinghkai wa ai rai nga ai. Shi a kanu kawa ni gaw, lusu nga pyaw ai Episcopalian makam masham hpung masha ni rai nga ma ai.

Elizabeth gaw, 1794 ning hta Seton mare na mying kaba ai wa, William kaw num wa nna, kashu kasha mangai mayat maya ai kun dinghku num mung rai nga ai. Elizabeth hte madu wa William gaw, 1803 ning hta Italy Mungdan, Livorno mare de sa du chyai ai shaloi, madu wa n myit mada ai sha si mat wa sai. Madu Wa a moi mang hpe dai mare kaw na, Kahtawlik Hpung masha ni gaw, alum ala rai makoi mayang ya ai hte ra kadawn ai lam shagu hta tsawra myit hte garum jaw ya ma ai.

Dai tsawra matsan dum ai mahkrum madup a majaw, Elizabeth gaw, Kahtawlik makam masham hpe grai ra sharawng wa ai. Dai majaw, shi a Episcoplian hpung masha ni grai hkum pat shing dang nga ai lapran hta, 1805 ning hta Elizabeth gaw, Kahtawlik makam masham de gale shang mat wa nu ai.

Nawku hpung de shang nna, masum ning na ai hpang Elizabeth gaw, Baltimore mare kaw jawng langai mi gap ya sai. Dai hpang shaning hta gaw, Maryland ginwang na, Emmisburg mare na, “Matsan dum ai San Joseph a Mama Magam Gun Wuhpung” (Congregation of the Sisters of Charity of St. Joseph” a shawng nnan na jawng hpe mung gaw gap yaw u ai. Dai majaw, shi hpe woi awn ya na ningbaw lit jawm shatsam ma ai majaw, 1821 ning du hkra dai lit magam hpe gun hpai lai wa ai. San Vincent de Paul a Matsan Dum Magam Gun Mama Wuhpung (Daughters of Charity of St. Vincent de Paul) a kasi kamang hpe hkan galaw nna, de da ai Shi a Mama Wuhpung (Sisters of Charity) ni gaw, American mungdan na, Jau Ginwang Laika Sharin Jawng (Parochial School System) ni hpe npawt gaw de ya ai Magam gun wuhpung rai nga ma ai.

San Pra ai Elizabeth Ann Seton gaw, Karai Magam gun hpai nga yang, 1821 ning, January shata praw (4) ya shani, Madu kaw yup pyaw ban sa mat wa sai rai nga ai.

Shi n nga mat ai hpang, 1963 ning, March shata (17) ya shani, dai aten na, Wa Sarabyin Yawhan (XXIII) kawn, A lu ai masha hku nna masat dat ya sai.

Bai 1975 ning, September shata (14) ya shani hta gaw, dai aten na, Wa Sarabyin Pawlu (VI) kawn, shi hpe San Pra ai masha dang dat let, shi a Poi Nhtoi hpe January shata praw (4) ya masat shagrau dat ya sai rai nga ai.

Daini Nawku Hpung gaw, San Pra ai Elizabeth Ann Seton a Poi Nhtoi hpe galaw nga ai shaloi, anhte marai hkum shagu mung, teng man ai makam masham hpe lu la ai hte maren, sak se hkam hkaw matsun lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)