San Pra ai Egwin a Poi Nhtoi (December 30)

San Pra ai Egwin gaw, tsa ban (7) hta, nga ngwi nga pyaw ai Marcian hkawhkam htinggaw kawn shangai chyinghkai wa ai rai nga ai. Wenyi lam hta alak mi rai myit sharawng ai wa mung rai nga ai majaw, kaji ai aten kaw nna, Jau jawng de sa nga mat ai.

A.D 692 ning hta, Worcester mare na, Saradaw aya dang da ai hkrum wu ai. Raitimung, shi a yaw shada ai lam ni hpe shi a ginwang na ni n lu hkan shatup ma ai. Shi a Jau ni a ntsa hkansa tara nau shaja ai majaw mung, rai nga ai.

Saradaw Egwin gaw, Roma mare de jamjau hkawm nhtawm sa du kau da ai hpang, England mungdan de bai nhtang du wa ai shaloi, Evensham mare kaw, Benedictine Jau jawng wa hpaw ya lai wa sai. Shi hte shi a Jau ni a lapran na manghkang ni mung galai shai wa sai, shi a myit jasat kaja hpe mu nna, masha law law makam masham hta ngang wa lu ma ai.

Kaga Benedictine Jau jawng law law hpe mung hpaw da ya ai. Evesham mare na, Jau jawng gaw, tsa ban hka-ang hkup ram hta mying kaba htum tai wa sai. Saradaw gaw, A.D 717 ning, December shata (30) ya shani, Madu hta yup pyaw ban sa mat wa sai rai nga ai. Shi a moimang hpe, Evesham mare kaw sha makoi mayang da ai rai nga ai.

Nawku hpung gaw, shi a poi nhtoi hpe, shi n nga mat wa ai, December shata (30) ya shani sha, ding yang galaw ya taw nga ai gaw, daini na aten du hkra rai nga ai.

Saradaw Egwin a labau kadun hpe hti hkaja la nna, anhte a prat hta mung, shing gyim masha rai nga ga ai hte maren, shading sharai ra ai lam ni hpe shading sharai kau nhtawm, grau mai kaja ai hku nna, hkawmsa lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)