San Pra Ai Dorathy A Labau Lam (06 August, 2019 )

San Pra Ai Dorath

          Nu wa hpu nau ni, San Pra ai Dorathy gaw, San Pra ai Hkristina a kanau  rai nga ai. Dorathy shangai chying hkai wa ai prat ten hta, Roma Du ni Nawku hpung hpe grai zingri zingrat galaw ai rai nga ai. Shingrai, Dorathy a kana yen rai nga ai Hkristina hte Kallista yen nau hkrit nna, makam masham hpung htak mat wa masai. Ya na zawn kana yen hpung htak mat ai raitim, Dorathy gaw, shi a myit masin hta nan lawm wa ai teng mam ai makam masham hpe sha manoi manat let, shi a makam masham hpe n shahten kau ai sha, Madu Karai Kasang hpe sha kam hpa nga nu ai. Daizawn Dorathy a kam sham ai myit nhten ai re majaw, mare na Mung Gyi wa, Dorathy hpe rim la nna, hpara sumla a man e, Nawku shangun nu ai. Dorathy gaw, shanhte gade mi nawku shangun ai raitim, myit masin hpe ja ja tawn let, dai hpara ni hpe Nawku ai lam n nga, shi kam sham ai Madu Yesu hpe sha kam sham taw nga sai. Dai majaw, Mung Gyi wa, masin pawt nna, Dorathy hpe rim la nhtawm me,  hpri ju jak hta shi hpe gyit da nna, rim zingri nga masai. Daizawn zingri hkrum ai raitim, Dorathy gaw, hkrit tsang ai lam n nga, dai zingri ai ni hpe naw zingri mu, ngu tsun dat nu ai. Bai, Dorathy gaw, “ya na zawn nanhte zingri nna, ngai si mat jang, Madu Yesu hte hkrum nna, shi a Mungdan hta nampan ni grai law wa na re,” ngu tsun dat ai hte yawng grai mau mat masai da.

          Dai hpang dai jak hta na Dorathy hpe shaw la nhtawm me, hpung htak nga ai kana yen hpe myit daw hten na matu, wa ap ya ma ai. Dai shaloi kana yen gaw, grai myit npyaw let, kanau hpe hpung htak na matu, tsun taw nga sai. Dorathy gaw, kana yen gade mi gung lau tsun tim, madat ai lam n nga, ning dang hkat let, ja taw nga sai. Hpang jahtum kana yen hpe Dorathy dang kau sai rai nga ai. Hpang jahtum kana yen myit malai wa nna, shan a kanau kam sham ai teng man ai makam masham de bai shang wa sai lam, nawku hpung a labau hta hpaw tsun da ai hpe mu lu nga mali ai nu wa ni. Ya na zawn kana yen teng man ai makam masham de shang mat wa ai lam, Mung gyi wa na nna, shan hpe rim la shangun nhtawm me, nat sat kau sai rai nga ai. Ndai zawn Mung Gyi wa, Dorathy a kana yen hpe zim nat sat kau ya ai re majaw, Dorathy a matu, makam masham lam hta grau ngang grin wa shangun sai, nga nna, hpaw tsun da ai hpe chye lu ai.  Grau nna, Dorathy gaw, shi a majaw kana yen sat kau hkrum ai re hpe chye nna, myit hta, kyu hpyi shaja let, mabyin masa ma hkra hpe, Madu Yesu kaw sha hpaw tsun dan nna, Chyoi Pra ai Hkum Sakramentu kaw sha n gun la nga nu ai.

          Nu wa ni, moi prat ten hta gaw, makam masham lam hta grai hkrit tsang ra ai ten ni nga lai wa sai lam, labau laika ni hta mu hti lu nga ga ai. Madu Yesu a prat hta mung, teng man ai re hpe chye nga ning len, ning hkrap ai hte, rim zing ri ai hpe Ja Chyum Mungga ni hta mu hti lu nga mali ai re. Nhkru nkaja ai ni gaw, shara kaja lu nna, mai kaja ai hku sak hkrung nga pra ai ni she adup zingri hkam ra ai hpe mu lu nga ai. San Pra ai Dorathy mung, teng man ai makam masham hta ru jung let, Madu Yesu hpe sha tsawra nga ai re majaw, Mung gyi ni nawku shangun ai nat hpara ni hpe n naw ku ai majaw, Dorathy hpe htau sat na matu, shaga la shangun sai. Shingrai, Mung Gyi wa a, shangun ma ni, Dorathy hpe sa dun la ai shaloi, daizawn dun wa ai lam yan tup hta, du gyi salang langai mi, shi hpe asawng asang nga nu ai. Dai du gyi salang wa, asawng let tsun dat ai gaw hpa ta nga jang, “Sumsing lamu na nam pan ni ngai hpe jaw rit, shaloi ngai mung Hkristu hpe nawku na,”  ngu nna asawng tsun dat ai lam rai  nga ai.  Mung gyi wa, Dorathy hpe sat na hkyen ai shaloi, mau hpa mabyin langai mi byin pru wa sai. Dai mabyin gaw hpa rai ta nga jang, grai tsawm ai Ma kasha langai mi, nampan lang nna, pru sa wa nhtawm me, Dorathy hpe jaw ai lam rai nga ai. Dai shaloi, Dorathy gaw, dai salang wa hpe sa jaw u, ngu dat nu ai. Dai Ma kasha gaw, Lamu Kasa rai nga ai.

          Lamu Kasa gaw, dai du gyi salang wa hpe nampan sa jaw nu ai. Ya na zawn lamu kasa nampan sa jaw ai ten gaw, nampan pu ai ten ladaw nre majaw, dai zawn nam pan pu hpe sa jaw nna, grai mau mat sai. Shingrai, Mung Gyi wa, ndai gaw Karai Kasang a lak lai ai lamik kumla nan she rai sai, nga nna, myit dum hprang wa nu ai. Dai majaw Mung Gyi wa, Dorathy shagun ai nampan ni hpe mu jang, Hkristu hpe kam sham nna, Yesu a amying majaw, shi mung tara sakse tai wa sai lam San Pra ai Dorathy a labau hta ka matsing da ai hpe mu lu nga mali ai nu wa ni. Ndai zawn Yesu a mying hte myit malai wa ai raitim, mungdan a tara masa a majaw, San Pra ai Dorathy hpe sat na shara de woi mat wa masai. Shingrai, dai shara kaw du ai hte shi hpe nhtu hte htau sai kau sai rai nga ai. Nu wa ni, San Pra ai Dorathy gaw, ya na zawn htau sat kau ai hkrum tim, hkrit tsang ai lam n nga, gwi gwi si hkam la sai gaw, lak lai mau hpa kaba nan rai nga ai. Karai Kasang hpe tsawra let, sak se hkam ai wa gadai mung, lak lai ai chyeju atsam ni hpe hkam la lu ai gaw teng sha rai na re. Shingrai, tsawra ai nu wa hpu nau ni, anhte mung, San Pra ai Dorathy a kasi la let, teng man ai makam masham hta gwi gwi sak hkrung hkawm sa nga ga ngu, n gun jaw mayu nngai. Bai, hkring tsang hpa zingri zingrat ni hte hkrum hkra wa ai raitim, San Pra ai Dorathy kaw ja ja akyu hpyi let, kam hpa nga ga. Teng sha hkam jan n gun lu la na ga ai re. San Pra ai Dorathy a poi nhtoi hpe Nawku hpung kawn nna, February Shata (6) ya shani ngu masat da ya sai rai nga ai. Shingrai, dai nhtoi du shagu, San Pra ai Dorathy kaw lak lai chyeju ni hpyi la nga ga ngu, n gun jaw dat lu n ngai law.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.