San Pra ai Dominic Savio a Poi Nhtoi (May 6)

San Pra ai Dominic Savio gaw, Ramma ni laksan kamhpa shagrau ai wa rai nga ai. Shi gaw, 1842 ning, April shata praw (2) ya shani, Italy Mungdan, Riva di Chieri mare kaw shangai chyinghkai wa ai rai nga ai. Shi a kanu kawa ni gaw, ja sut gan lam hta matsan ai ni raitimung, wenyi lam hta gaw, lusu ai ni rai ma nga ai.

Dominic Savio gaw, ma kaji ten kaw nna wenyi hte seng ai shaman chyeju law law hkam la lu ai. Shi a asak (5) ning has naw rai nga ai aten kaw nna, Missa tau chye sai. Asak (7) ninh du ai hte Chyoi Pra Hkum hkam la lu sai rai nga ai. Chyoi Pra Hkum hkam la ai shani, shi a prat tup hkan sa shatup na lam ni hpe ka matsing da wu ai.

Dai hkan sa tara ni gaw, (1). Ya sha ya sha mara raw na, Chyoi Pra Hkum hpe hkam la na. (2). Nawku Hpung Poi shani hpe shachyoi shapra myit hte shang galaw lawm na. (3). Madu Yesu hte Nu Maria hpe “Nye a kaja dik manang jinghku ni shatai na.” (4). Mara galaw na malai si hkam na, nga ai hkan sa shatup na tara ni rai nga ai.

Shi a asak (12) ning du ai shaloi, Dominic Savio gaw, San Pra ai Don Bosco hte sa hkrum nna shi a shaman shakyang ya ai jawng kaw sa lung wu ai. Ndai jawng kaw shi a san pra ai lam hpe gaw de hpang la lu nu ai. Akyu hpyi shaja let, laika hpaji ni hpe grai shakut nna sharin la sai. Shi hte seng ai bungli ni hpe kaja di kai hku nna hkan galaw ai; manang ni hpe matsan dum ai; kabu ai nsam tup madun ai majaw, shi a manang ni grai law wa ai. Masha hkum gu, tinang a wenyi hkye la ai hkrum lu na matu, Npawt Mara N Kap ai Shangai wa ai Nu Maria Wuhpung “Solidarity of the Immaculate Conception” hpe de hpang wu ai.

Dominic Savio gaw, hkamja lam n kaja wa ai amjaw, shi a daidaw buga de bai nhtang wa mat ai. Daidaw buga de du ai hpang, 1857 ning, shi a asak (15) ning hta, Madu kaw yup pyaw ban sa mat wa sai rai nga ai.

Shi n nga mat ai hpang, 1950 ning, March shata (5) ya shani, dai aten na Wa Sarabyin Pius (XII) gaw, shi hpe A Lu ai masha ngu masat shagrau dat sai rai nga ai.

Dai hpang, 1954 ning, June shata (12) ya shani, Wa Sarabyin Pius (XII) sha, shi hpe San Pra ai masha dang dat let, shi a Poi Nhtoi hpe mung, May shata (6) ya shani ngu masat shagrau dat ya sai rai nga ai.

Daini Nawku Hpung gaw, San Pra ai Dominic Savio a Poi Nhtoi hpe galaw nga ga ai aten hta, anhte a prat hta mung, Mara raw, Chyoi Pra Hkum Sacramentu hpe hkungga manu shadan let sak hkrung hkawmsa chye ai ni byin tai lu na matu, ra nga ai chyeju ni hpe hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)