San Pra ai Dominic a Poi Nhtoi (August 8) 08 August 2022

San Pra ai Dominic a Poi Nhtoi (August 8)

San Pra ai Dominic gaw, “Ordo Praedicatorium” mying ai Sasana Magam Gun Wuhpung hpe gaw de hpang ai San Pra ai Masha rai nga ai. Shi gaw, 1170 ning, August shata (8) ya shani hta, Spain Mungdan, Caleruega mare kaw shangai chyinghkai wa ai rai nga ai. Shi Jau tai wa ai hpang, Osama Mare na, Cathedral Nawku Htingnu kaw lit shatsam ya ai hkrum sai. Dai kaw e, San Pra ai Augustine a hkan sa ritkawp tara hpe shatup nna nga nga ai.

Madu a shaning 1204 ning hta Denmark mungdan de, shi sa wa ai hkrun lam kaw, Toulouse Hotel Madu hpe Hkristan Makam Masham hkap la lu shangun wu ai. Dai mabyin  hpe sumru yu nna, tara hkaw atsam gaw shi lu la ai shaman chyeju re ai hpe chye lu ma ai majaw, Francis amyu sha Albigen masha ni hpe mung, Nawku Hpung de shang wa na matu tara hkaw lit hpe shatsam ya ai hkrum nu ai. Shaning tsawm ra mi na hkra, akyu hpyi ai hte kasi kaja madun ai majaw, masha law law Kahtawlik Nawku Hpung de bai nhtang shang wa ma ai. Hpung htak mat ai ni hpe bai myit malai wa lu na matu, lit la nga ai Citeaux Mare na Tawra Jau ni, shanhte yaw shada ai lam n awng dang ma ai. Dai shaloi, San Pra ai Jau Dominic gaw, “Nanhte a hkum hpe nhtu n-ga a malai, akyu hpyi hte lajang mu; tsawm htap ai buhpun palawng a malai shagrit shanem ai myit jasat hpe hpun dagraw mu.” nga nna matsun wu ai. (Arm yourself with pyarer, rather than sword; wear humility, rather than fine clothes.)

Kalang mi, shi grai ning tawn ai tara hkaw ladat hpe gara laika buk kaw na lu la ai kun? nga nna san hkrup ai; “Tsawra Laika Buk hta lai nna, kanang kaw na mung n lu la ai.” (In no other than the Book of Lover) nga nna bai htan ya ai lam, shi a labau hta mu hti lu nga ai.

Wa Jau Dominic gaw, Ordo Praedicatorum mying ai, “Mungga Htawn Wuhpung” hpe gaw de hpang ai. Dai Wuhpung gaw, laili laika hti shakut shaja nna, Mungga htawn ai lam hpe madung tawn shakut sharin shaman ai wuhpung rai nga ai. Dai Wunhpung hpe Nawku Hpung gaw, 1216 ning hta madi shadaw ya sai. Shi gaw, shi a Jau ni hpe “to speak of God or with God” (Karai Kasang a Lam shing n rai Karai Kasang hte sha shaga mu) nga nna shadum ya lai wa ai.

Bai Nu Maria hpe hkungga shagrau ai Rosary akyu hpyi ai lam hpe mung, Wa Jau Dominic shalat hpang da ai rai nga ai. 1217 ning na Nu Maria Lamu de Shalun La Hkrum ai Poi Nhtoi “Assumption” hta shi a Dominican Jau ni hpe shara shagu de shangun dat nhtawm, “Nli ni hpe gaw anhte gat hkai ra ai; n mai kyem da ai.” (We must sow the seed, not hord it.) nga nna shadum matsun dat sai. San Pra ai Jau Dominic gaw, Bologna mare kaw garai n wa hkring sa mat yang, shaning tsawmra na hkra Roma mare kaw nga kau da wu ai.

Ndai zawn Wa Jau Dominic gaw, Sasana magam hpe n hkring n sa shakut kau da ngut ai hpang, Bologna mare kaw, 1221 ning, August shata (6) ya shani, shi a asak (51) ning hta, Madu kaw yup pyaw ban sa mat wa sai rai nga ai.

Wa Jau Dominic n nga mat ai hpang, 1234 ning, July shata (13) ya shani hta dai aten na, Wa Sarabyin Gregory (9) kawn, Shi hpe, San Pra ai Masha dang dat let, Shi a Poi Nhtoi hpe mung, August shata (8) shani masat shagrau dat ya sai rai nga ai.

Daini Nawku Hpung gaw, San Pra ai Wa Jau Dominic a Poi Nhtoi hpe galaw nga ga ai aten hta, anhte hpung masha ni mung, San Pra ai Wa Jau Domic zawn, kadun la ai shing gyim prat hta, Madu Karai Kasang Wa a Sasana Magam hte mai kaja manu dan ai magam bungli ni hpe dang lu ai daram galaw shakut hkawmsa lu ai ni byin tai lu hkra shakut sa wa nga ga law.  

By;

Sister Rose Angeline Maran Nang Doi (SFX)

RVA-Kachin Service (Myitkyina)