San Pra ai Dawi a Poi Nhtoi (March 1)

San Pra ai Dawi gaw, England Mungdan a dinghku maga na Wales Mungchying sha ni lak san kam shamyet ai San Pra ai Masha rai nga ai. Wales Mungdaw na, mung chying sha ni hpe lam woi zinlum la lu ai San Pra ai Dawi gaw, Dingda Wales Mungdaw kaw na Hkawhkam Sant hte Hkawhkam Jan San Pra ai Non yan kawn, A.D (500) ning dam ram hta shangai chyinghkai wa ai rai nga ai.

Shi gaw, Wenyi lam woi ningshawng shaman chyeju atsam lu ai wa rai nga ai hte kasi madun ya lu ai wa rai nga ai majaw, Shi sak naw hkrung nga ai shaloi, Tawra Jau jawng ni law law hpaw da ya ai Saradaw mung rai nga ai. Shi woi awn ai Tawra Jau ni gaw, tinang a myit ra hpe ning dang ai lam, wenyi lam hta atsam da tai lam hte sak hkrung hkawm sa ma ai. Shanhte gaw, tsa chyaru, tsabyi, beer ni tsep kawp n lu ma ai; hka ntsin hpe sha lu ma ai. Shani tup lana lana re ai bungli galaw ai (Shing n rai) shani tup laika sharin hkaja ai nhtoi ngu msat let hkan shatup ma ai.

San Pra ai Dawi gaw, wenyi lam woi ning shawng tai lu ai atsam shaman chyeju lu ai wa rai nga ai. Cardiganshire ginwang na Brevi mare kaw galaw ai Hpung Zuphpawng kaw ahkyak kaba lam law law hta hpaji jaw ya lu ai majaw, Wales mungdaw na Nawku Hpung a matu, lit hkam Saradaw Kaba aya tang da ai hpe hkrum nu ai. Bai nna, Shi gaw Chyoi Pra ai Buga (Holy Land) de akyu hpyi buhkawm sa nna, Yerusalem mare de du ai shaloi, Yerusalem mare kaw na Saradaw Kaba kawn shi hpe Saradaw Kaba aya tang ai hpe hkrum wu ai. Pelagianism ngu ai shut shai ai masa hte sharin shaga ai lam hpe asan sha ninghkap kau lu wu ai. Zup hpawng hpe mung woi awn galaw ya sai.

San Pra ai Dawi gaw, A.D (589) ning, March shata praw (1) ya shani hta, Menevia mare na Shi a Tawra Jau kaw, Madu hta Yup Pyaw Bansa mat wa sai rai nga ai.

Shi n nga mat ai hpang, 1123 ning hta, dai aten na, Wa Sarabyin Callixtus (II) kawn Shi hpe San Pra ai Masha dang dat let, Shi a Poi Nhtoi hpe mung, March shata praw (1) ya shani ngu masat shagrau dat ya sai rai nga ai

By;
Sister Rose Angeline Maran Nang Doi (SFX)
RVA-Kachin Service (Myitkyina)