San Pra ai Cuthbert a Poi Nhtoi (March 20)

San Pra ai Cuthbert gaw, asak grai naw kaji ai aten kaw nna kanu kawa n nga mat sai. Sagurem ai chyahkrai ma prat hte nga kaba lai wa ai. Shi a sak hkrung prat tup akyu hpyi shaja nna, makam masham hte hkrat sak hkrung lai wa sai. Shi gaw, Tawra Jau tai wa nna shi a makam masham myit a majaw hte bungli hpe grai galaw shaku tai majaw, lit magam langai hpang langai shatsam ya ai hpe hkrum lai wa sai. Jau kaba lit, Tawra Jau ni hpe up hkang ai Jau Kaba hte de a hpang, England hte Ireland mungdan a dinghku maga na Lindisfarne mare kaw na Saradaw lit tang da ai hkrum lai wa sai.

Saradaw kaba Cuthbert gaw, shi hkrai asim sha tawra tara shatup nna nga na sharawng ai majaw, ahkang hpyi nna ahkang lu sai; raitimung, Hexam ginwang kaw na Saradaw lit magam gun langai mi rai nga ai majaw, asi sha shi hkrai tara shadik na n mai byin nu ai. Dai majaw, matsan masha ni, kabai da hkrum ai ni hpe yu gawn ai aten hta lai jang, shi chyu asim sha tara shadik nna nga ai. Shi gaw, ting kyeng myit n rawng ai sha, masha kaga a matu galaw daw ai amu hpe madung tawn galaw ai; shi gaw, machyi makaw shamai shatsai ya lu ai hte mabyin ni hpe tau nna mu chye ai shaman chyeju atsam lu ai. Hku hku ai majaw, machyi makaw hkrum ai ni law law hpe shamai ya lai wa sai.

Shi galaw daw jau ai lam ni, hpaji machye machyang hte pu ai ba ai lam n nga ai myit jasat ni hpe mu lu nna, masha law law makam masham lam de du wa lu ma ai.

Saradaw Cuthbert gaw, A.D 687 ning, March shata (20) ya shani, Lindisfarne mare kaw, Madu hta yup pyaw ban sa mat wa sai rai nga ai.

Daini Nawku hpung gaw, San Pra ai Saradaw Cuthbert a Poi Nhtoi hpe galaw nga ga ai aten, anhte a prat hta mung, myit mada shara n nga na daram myitru myit kaji garen ai lam ni hkrum hkra wa ai raitim, Karai Kasang Wa kaw akyu hpyi myit n gun la let, sak hkrung hkawmsa lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)