San Pra ai Cosmas hte Damian a Poi Nhtoi (September 26) 26 September 2022

San Pra ai Cosmas hte Damian a Poi Nhtoi (September 26)

San Pra ai Cosmas hte Damian gaw, Arabia mungdan kaw shangai chyinghkai wa ai yan nau rai nga ai. Shan nau hpe “Tsi sara ni laksan kam shamyet mai ai San Pra ai masha” ngu nna masat shagrau da ai rai nga ai.

Tsi hpaji hpe Syria mungdan hta sharin hkam la nhtawm Silicia Mungdan, Aegea mare kaw bungli galaw nna grai ning tawn ai tsi sara ni tai wa masai. Tsi tsi ai magam bungli hpe grai shakut nna galaw timung, machyi ai ni kaw na tsi manu jahpu galoi n la ya ma ai. Shan nau a bungli galaw ai myit jasat hte Hkristian makam masham hpe hkan shatup ai, kasi ningli ni hpe mu nna masha law law wa, Karai Kasang hpang de gayin shang wa ma ai.

Shan nau gaw, A.D 283 ning hta Diocletian mazut ni e, Jen noi tawn ai hpang baw kahtam sat kau hkrum lai wa ma ai. Shan nau kaw akyu hpyi garum la ai majaw, machyi makaw hkrum ai masha ni law law wa lamik kumla amyu myu hpe hkam la lai wa masai. Machyi masha ni yup nga ai shaloi, shan nau dan pru wa nna, gara hku tsi tsi la na lam sa matsun dan dan rai ma ai; ndai zawn akyu hkam sha ai ni hta Hkawhkam Justinian (I) mung lawm nga ai lam, shan nau a labau hta ka matsing da nga ai.

San Pra ai yan nau hpe masat ding sat shagrau nna Nawku jawng ni law law gaw gap tawn da ma ai. Dai ni hta na Roma mare na tsawm htap la ai “San Cosmas hte Damian Nawku Htingnu” Basilica mung langai mi rai nga ai.

Tinang a tsi hpaji machye machyang ni hpe, tinang a makam masham majen je lak nat shatai nhtawm amu gun hpai lai wa ai, myit galu ai hte jam jau hkam sharang ai lam ni a majaw, Nawku hpung a tai hpyen ni hta si hkam ra tim, Shannau hpe Nawku hpung kawn nna, San Pra ai Masha Yan Nau hku nna, Shaning shagu September shata (26) ya shani, masat shagrau nga ga ai re. San Pra ai Cosmas hte Damian Yan kaw ra ai akyu hpyi garum ya na matu, grau nna tsi sara ni akyu hpyi la nga ma ai.

Daini Nawku hpung kaw nna, San Pra ai Cosmas hte Damian Yan Nau a Poi Nhtoi hpe galaw nga ga ai hte maren, anhte hpung masha ni mung, Tsi Sara Cosmas hte Damian Yen Nau zawn, tinang chye da ai hpaji machye machyang ni hpe akyu jashawn jai lang let hpawn, tinang lu da sai makam masham hpe sak se hkam ai ni byin tai nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)