San Pra ai Cornelius hte Cyprian Yen a Poi Nhtoi (September 16)

San Pra ai Cornelius gaw, Hkristian Hpung masha ni hpe Kecius hkawhkam e zingri shamyit shatsang ai aten, A.D (251) Ning hta Sarabyin lit shatsam hkrum ai, shi Sarabyin tai ai hpang kade n na yang, Africa mung kaw na makam masham htak ni shada lapran manghkang byin wa ai.

Carthage mare na, San Pra ai Saradaw Cyprian gaw myit malai lu ai ni hpe ari dan, penance hkam la ngut ai hpang bai hkap la na matu tang shawn ai; raitimung shi a Jau nkau gaw shanhte hpe Nawku Hpung kaw nna shapraw kau mayu ma ai.

Sarabyin Cornelius gaw, Saradaw hpyi shawn ai hte maren Hpung htak myit malai lu ai ni hpe bai hkap la na matu daw dan ya ai. Sarabyin dawdan ai hpe n hkap la ai Novatian mying ai wa gaw, shi hkum shi Antipope, "Sarabyin hpe ninghkap ai wa" ngu shamying la kau hkra rai, manghkang kaba shabyin ya ai. Novatian gaw labau hta shawng lang na "Sarabyin hte nhtan shai ai wa" rai nga ai. Shi hpe Nawku Hpung kaw nna shapraw kau ai. Raitimung shi a hpang hkan ni gaw, tsa ban ram ram na hkra Nawku Hpung hpe matut nna dingbai ding na naw jaw ma ai.

A.D (253) ning hta Hkawhkam Kaba Gallus (snr) Emperor Gallus gaw Nawku Hpung hpe bai zingri shamyit hpang ai. Shi gaw Sarabyin Cornelius hpe Civitavecchia ginwang de gawt shapraw kau ai:  dai yang e laja lana re ai ru yak jamjau jamhkau a majaw Sarabyin Cornelius nsa hti mat ai. Shi a moi mang hpe San Pra ai Callistus Lupwa kaw makoi mayang kau ma ai.

Ndai mabyin a hpang (5) ning na ai shaloi, Madu Yesu a sakse tai na matu, San Pra ai Saradaw Cyprian a aten bai du mat ai. Ginwang uphkang du Galerius Maximus gaw Saradaw hpe shi a ahkaw ahkang hpe rap di tawn kau nna, hkawhkam hpe nawku na matu shagwi ai. Saradaw Cyprian gaw: "Dai hte seng nna myit hkrum lawm na lam tsep kawp n nga ai." nga nna bai htan ai. Ginwang uphkang du gaw shi a hpaji jaw masha ni hte bawngban ai hpang, Saradaw hpe nhtu hte kahtam sat kau na dawdan ma ai. Shaloi San Pra ai Saradaw Cyprian gaw: "Karai Kasang hpe chyeju dum dik sai." nga nna bai htan ya ai.

Hkristian wuhpung kaba gaw Saradaw a hpang, shi hpe sat kau na shara de hkan nang sa ma ai. San Pra ai Cyprian gaw, shi hpe sat na wa hpe gumhpraw lap (25) jaw kau da ai hpang, lahput hputdi nna si hkam na matu akyu hpyi kau da ai. San Pra ai Saradaw Cyprian hpe makam masham hte seng nna sat kau ai hpang nhtoi kade n na yang up hkang du Galerius Maximus mung si mat wa sai.

Daini Nawku hpung gaw, San Pra ai San Pra ai Cornelius hte Cyprian yan a poi hpe galaw nga ga ai aten, anhte hpung masha ni marai hkum shagu mung, San Pra ai ni a kasi ningli hte shanhte a shakut shaja lai wa sai lam ni hpe kasi yu la nna, tinang prat hta mung, ta tut jai lang lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)