San Pra ai Cornelius hte Cyprian Yan a Poi Nhtoi (September 16) 16 Sept 2023

San Pra ai Cornelius hte Cyprian Yan a Poi Nhtoi (September 16)

San Pra ai Cornelius gaw, Hkristian Hpung masha ni hpe Kecius Hkawhkam kawn zingri shamyit shatsang ai aten, A.D (251) Ning hta Sarabyin lit shatsam hkrum wu ai. Shi Sarabyin tai ai hpang kade n na yang, Africa mungdan kaw na makam masham htak ni shada lapran manghkang byin wa sai.

Carthage mare na, San Pra ai Saradaw Cyprian gaw myit malai lu ai ni hpe ari dan, penance hkam la ngut ai hpang bai hkap la na matu tang shawn ai; raitimung shi a Jau nkau mi gaw shanhte hpe Nawku Hpung kaw nna shapraw kau mayu ma ai.

Sarabyin Cornelius gaw, Saradaw Cyprian hpyi shawn ai hte maren Hpung htak myit malai lu ai ni hpe bai hkap la na matu daw dan ya sai. Sarabyin dawdan ai hpe n hkap la ai Novatian mying ai wa gaw, shi hkum shi Antipope, "Sarabyin hpe ninghkap ai wa" ngu shamying la kau hkra rai, manghkang kaba shabyin dat nu ai. Novatian gaw labau hta shawng lang na "Sarabyin hte nhtan shai ai wa" rai nga ai. Shi hpe Nawku Hpung kaw nna shapraw kau ma ai. Raitimung shi a hpang hkan ni gaw, tsa ban ram ram na hkra Nawku Hpung hpe matut nna dingbai ding na naw jaw lai wa ma ai lam, labau hta ka matsing da nga ai.

A.D (253) ning hta Hkawhkam Kaba Gallus (snr) Emperor Gallus gaw, Nawku Hpung hpe bai zingri shamyit hpang wa sai rai nga ai. Shi gaw Sarabyin Cornelius hpe Civitavecchia ginwang de gawt shapraw kau wu ai. Dai yang e laja lana re ai ru yak jamjau jamhkau a majaw Sarabyin Cornelius n nga mat wa sai rai nga ai. Shi a moi mang hpe San Pra ai Callistus Lupwa kaw makoi mayang kau ma ai.

Ndai mabyin a hpang (5) ning na ai shaloi, Madu Yesu a sakse tai na matu, San Pra ai Saradaw Cyprian a aten bai du mat sai. Ginwang uphkang du Galerius Maximus gaw Saradaw hpe shi a ahkaw ahkang hpe rap di tawn kau nna, hkawhkam hpe nawku na matu shagwi wu ai. Saradaw Cyprian gaw: "Dai hte seng nna myit hkrum lawm na lam tsep kawp n nga ai." nga nna bai htan ai. Ginwang uphkang du gaw shi a hpaji jaw masha ni hte bawngban ai hpang, Saradaw Cyprian hpe nhtu hte kahtam sat kau na dawdan ma ai. Shaloi San Pra ai Saradaw Cyprian gaw: "Karai Kasang hpe chyeju dum dik sai." nga nna bai htan ya ai.

Hkristian wuhpung kaba gaw, Saradaw a hpang, shi hpe sat kau na shara de hkan nang sa ma ai. San Pra ai Cyprian gaw, shi hpe sat na wa hpe gumhpraw lap (25) jaw kau da ai hpang, lahput hputdi nna si hkam na matu akyu hpyi kau da ai. San Pra ai Saradaw Cyprian hpe makam masham a maja, sat kau ai hpang nhtoi kade n na yang up hkang du Galerius Maximus mung si mat wa sai rai nga ai.

San Pra ai Cornelius hte Cyprian Yan n nga mat ai hpang, Nawku HPung gaw, Shan Lahkawng hpe San Pra ai Masha dang dat let, Shan a Poi Nhtoi hpe mung, September shata (16) ya shani ngu masat shagrau dat ya sai rai nga ai.

Daini Nawku hpung gaw, San Pra ai San Pra ai Cornelius hte Cyprian Yan a Poi Nhtoi hpe galaw nga ga ai aten, anhte hpung masha ni marai hkum shagu mung, Wa Sarabyin Cornelius hte Wa Saradaw Cyprian yan a kasi ningli hpe yu la nna, anhte lu da sai Makam Masham hpe kaning re ai ru yak jam jau lam, zingri zing rat lam ni hkrum wa ai raitim, myit n daw n hten ai sha sak se hkam lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)