San Pra ai Columban a Poi Nhtoi (November 23) 23 November 2022

online image

San Pra ai Columban a Poi Nhtoi (November 23)

San Pra ai Columban gaw, Irish amyu sha ni kaw na magrau grang dik ai Sasana magam gun langai mi rai nga ai. Shi gaw, A.D 563 ning hta West Lenster mare kaw shangai chyinghkai wa ai rai nga ai.

Shi a brang ram ten hta mahkawn kasha ni law law shi hpe n gup aga hte mung, laika hte mung, shagun dingsi madun nna gung lau lai wa ma ai. Columban chyawm gaw, tara grai shakut ai num langai mi kaw hpaji sa hpyi ai.

Dai num gaw, “Mahkawn ni kaw nna nang gaw aloi sha yen mat lu na shadu n dai i? Eva a mahkam kaw Adam hkrum lai wa sai nang n dum n-ni? N-gun ja ai la-ba wa Samsun mung, Delilan mying ai num sha e mahkam hkam la kau ai n rai a ni? Dingman lam hta mying kaba dik ai Dawi hkawhkam mung, Bathsheba mahkawn a tsawm htap la ai agung alau kaw lawm mat wa ai n rai a ni? Hpaji byeng-ya kung zet dik ai Solomon Hkawhkam mung, tsawm tsawm re ai num ni e gung lau lu ai n rai a ni? Kaga shara de sha hkawm mat wa u. Masha law law hka yawng hkrat si ai hka hpe shingdu yawn di kau da u.” nga nna hpaji jaw wu ai. Ndai hpaji jaw ga matsun na lu ai majaw, Columban gaw, shi a dum nta masha ni hte makin jinghku ni hpe tawn kau da nhtawm, Jau Tai Jawng de shang mat wa nu ai.

Columban a asak (45) ning du ai shaloi, Fransik mungdan hte Italy mungdan shara shagu de du nhtawm, matsan ai masha ni hpe Karai Kasang a tara mungga ni hkaw dan ai hte Jau ni nga na jawng law law hpe mung, gap da ya lai wa sai. Dai jawng ni gaw, hkansa ritkawp tara grai ja ma ai; jawng wang kata de num ma ni, manam ni hpe n shang shangun ma ai. Dai kaw na Jau ni mung, tinang a amu galaw ai made sha, lu sha na matu, aten shagu ngu na daram, asim sha nga ma ai.

Ndai hte seng nna, “Gamung Naura Jahta ai, manang wa a lam tsun ai, hpa sha n re ai hte seng nna grai wa zawn hpaji jaw ga tsun hkat ai, manang wa a shingdu kaw shi a lam shatan ga tsun nna aten shama nga ga ai. Tinang a shinglet hpe n lu hkang ai ni gaw asim sha nga yang she mai ai; tsun shaga jang mung kabu gara hpa, myit sim myit sa shangun ai lam hte seng nna sha tsun shaga ra ga ai.” nga nna San Pra ai Columban ding ngam tsun shadum lai wa sai.

San Pra ai Columban gaw, A.D 615 ning, November shata (21) ya shani hta, Bobbio Jau jawng hta, Madu kaw yup pyaw ban sa mat wa sai rai nga ai. Shi n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, November shata (23) ya shani masat shagrau dat ya sai rai nga ai.

Daini gaw, anhte a Myanmar Mungdan, grau nna Jinghpaw Mung de Sasana shang let, Buga Jau, Saradaw ni hpe lu la hkra sa shalat shapan, Karai Wa a wenyi nli tum hpe sa gat hkai kau da sai, Columban Sasana Magam Gun, Jau, Mama ni a Poi Nhtoi mung rai nga ai hte shanhte a matu lak san akyu hpyi ya nga ga. Bai nna, San Columban a sak hkrung lam hpe anhte madat hkaja la lu sai hte maren, anhte a sak prat hkrun lam hta mung, Karai Kasang Wa myit ra sharawng ai hkrun lam hta sak hkrung hkawmsa lu hkra shakut sa wa ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

7 + 11 =