San Pra ai Claude La Colombière a Poi Nhtoi (February 15)

San Pra ai Claude La Colombière gaw, Fransik amyu sha, Jesuit Jau langai mi rai nna, shi gaw, lai wa sai 1641 ning, February shata praw (2) ya shani hta shangai chyinghkai wa ai rai nga ai.

Madu Yesu a Salum Ning Sang hpe alak mi hkungga ai shakawn shagrau ai masing hte seng ai kasa langai mung rai nga ai. Shi gaw, San Pra ai Margret Mary Alacoque a wenyi lam hpaji jaw ya ai Jau rai nga ai. San Pra ai Margret Mary gaw, Paray-Le-Monial mare na, Vistitation Mama jawng na, Mama, Madu Yesu hpe hkungga shagrau ai lam hte seng ai shaman chyeju ahkaw ahkang lu ai san pra ai masha rai nga ai.

San Pra ai Claude La Colombière gaw, Fransik mungdan, Paris mare kaw ga sahga atsam hte hpaji jaw atsam ni hte seng nna grai mying kaba ai. England mungdan, York mare up hkang du kaba jan (Duchess of Youk) hpe tara jahprang ya na matu, lit shatsam hkrum nu ai. Dai lit hte hpawn Madu Yesu a Salum hpe laksan hkungga ai magam a matu mung, gagam gun lai wa sai. Ndai zawn masha ni hpe Kahtawlik makam masham de jashawn lu ai atsam a majaw, sat kau na matu daw dan ai hpe hkrum wu ai. Raitimung, dai dawdan ai lam galai shai mat wa ai hte machyi taw nga ai kaw, Fransik mungdan de bai n htang wa lu mat ai.

San Pra ai Claude La Colombière gaw, 1682 ning, February shata (15) ya shani, shi a asak (41) ning hta Paray-le Monia mare kaw, Madu hta yup pyaw ban sa mat wa sai rai nga ai.

Shi n nga mat ai hpang, 1929 ning, June shata (16) ya shani hta dai aten na Wa Sarabyin Pius (XI) gaw, A lu ai masha hku nna shagrau dat sai.

Dai hpang, 1992 ning, May shata (31) ya shani gaw, dai aten na Wa Sarabyin Yawhan Pawlu (II) kawn shi hpe San Pra ai masha dang dat let, shi a Poi Nhtoi hpe mung, February shata (15) Ya shani masat shagrau dat ya sai rai nga ai.

Daini Nawku hpung gaw, San Pra ai Claude La Colombière a Poi Nhtoi hpe galaw nga ai aten hta, anhte a Myanmar Mungdan hta Jet ai simsa ai lam hpe lu la u ga matu hte mung chying sha ni yawng, ngwi pyaw simsa let, sak hkrung hkawm sa lu na atsam Karai Kasang Wa jaw ya rit ga matu, lak san akyu hpyi nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)