San Pra ai Clare a labau lam ( 30 July, 2019 )

San Pra Ai Clare

              Nu wa hpu nau ni, San Pra ai Clare gaw, Madu a shaning (1193) ning hta, Italy Mungdan Assisi mare hta shangai dai daw wa sai lam chye lu ai. Clare gaw, naw kaji nga ai ten kawn nna, kaja ai akyang lai len rawng ai hte, kaja ai lam hpe sha sharawng awng ai shayi sha mung rai nga ai. Dai majaw, (1212) ning aten na, kungla shaman poi nhtoi shani hta, Missa hkungga akyu hpyi la nhtawm me, shi a manang Jau langai mi hte, San Francis a Jawng de hprawng shang mat wa nu ai. Shaloi, Chyoi Pra ai Nu Maria a tawn e, shi a kara hpe rep kau ai hte, lachyit palawng hpun nna, nshang kaw sumri shingkyit kyit rai, dai San Francis Jawng  kaw nga taw nga sai. Clare, ya na zawn Jau a hpang hkat let, Francis Jawng de nga mat ai majaw, shi a kanu kawa ni, masha law law hpe garum hpyi shaga la nhtawm me, Clare hpe sa woi la ma ai. Raiitm, Clare gaw, kanu kawa ni sa woi la ai hpe nra sharawng ai sha n ga, nhkan nang wa ai lam chye lu ai. Dai majaw, shi hpe gang dun garawt ma ai da. Daizawn gang dun garawt wa ai re majaw, Clare gaw, Nawku Tawn hta jum da nga nu ai. Ya na zawn Clare Nawku tawn hpe jum da ai ten, Clare a kara hpe rep kau ya ma ai da. Dai rep kau ai kara hpe Clare hpe madun ai hte, Clare gaw, myit npyaw ai lam n nga, ndai zawn ngai a kara hpe rep kau ya ai gaw, Madu Karai Kasang ngai hpe shaga la ai nan rai sai, ngu, bai tsun dat nu ai. Shingrai, Clare a kanu yen kawa hte, manaw manang ni bai nhtang mat wa masai lam labau hta matsing da nga mali ai re.

          San Pra ai Clare gaw, ya na zawn, dum nta masha ni shi hpe Mama tai na matu, Karai Kasang a magam hta shakut na matu, myit nhkrum ai raitim, Madu Yesu hpe grai tsawra ai re majaw, dai San Francis Jawng kaw sha pyaw taw nga sai. Bai nna, San Seng San Pra ai prat hte Madu Karai Kasang kaw ap nawng daw jau na matu, Tara shadik let nga nga nu ai. Ya na zawn Tara shadik nga let, hpang jahtum Mama Uhpung langai hpe gaw de na matu, seng ang ai Nawku hpung a ningbaw ningla ni hte jahkrum bawng ban la sai. Dai hpang, San Pra ai Clare gaw, Mama hpung langai mi hpe hpaw hpang la lu sai rai nga ai. San Pra ai Clare a Mama uhpung na yaw shada lam madung gaw, “ Karai Kasang hpe tsawra let, hkam sharang ai hte, shakut sharang, shakut shaja, ap nawng daw jau ai hpung” rai nga ma ai. Ndai San Pra ai Clare a Mama uhpung gaw, grai hkrik hkam tsawm htap ai hku n nga ai sha, hpun palawng mung, lachyit palawng hpun ai hte Jawng wang shinggan de npru ai sha, Jawng kata kaw sha nga let, akyu hpyi shaja ai hte, shana ten hta mung, yup tung hkying 12:00 ten hta rawt nna, Karai Kasang hpe nawku shakawn, Chyoi Pra ai Hkum sin akyu hpyi ma ai.

          Tsun ga nga jang, ya daini na ten, Myen myu sha ga hku, Ya-te ngu shamying ai, Se-hkam ni zawn rai nga ai. Shat lusha mung, tinang kam ai ram, tinang mu dum ai hku nmai sha ai, masha ni sa tawn da ya ai daram sha, sha ma ai, nga nna labau hta matsing da ma ai. Bai nna, shanhte a lata hta gumhpraw nmai tawn da ai hku re. Lama na lang na arung arai, sha hpa malu masha ni ma mat jang, ding si dum dat dat di ma ai da. Dai shaloi, shanhte hpe yu ai ni, alu jaw ai ni, malu masha daw jaw ai ni, sa nna, bai sa jaw ma ai lam chye lu ai. Nu wa ni, San Pra ai Clare a Mama uhpung gaw, ya na zawn tara gade ja ai raitim, dai mama uhpung de shang ai Num sha mahkawn ma ni law law re lam shanhte mama uhpung a labau hta mi hti lu nga mali ai re. Ndai zawn Rit-kawp tara gade ja ai raitim, Mama tai ai masha law ai lam gaw, Kaja wa nan Karai Kasang hpe tsawra ai ap nawng daw jau ai lam a majaw rai nga ai. San Pra ai Clare shi hkum nan, grai tara shadik ai re majaw, Karai Kasang kaja wa shaman chyeju jaw ya ai lam rai nga ai. Dai majaw, kam sham ap nawng daw jau ai lam hta, magam bungli gaw grai ahkyak nga mali ai re.

          San Pra ai Clare a Mama Uhpung de, ya na zawn mama tai ai ni law wa ai hte, masha yawng chye wa ai re majaw, manawn masha mung law law rai nga ai. Nmyit mada ai lani mi na ten hta, Moslem damya ni shanhte a jawng grup yin sa wang nga ma ai da e. Shaloi Clare gaw, Chyoi Pra ai Hkum rawng ai gawm hpe chyinghka lam kaw sa tawn da nhtawm me, akyu hpyi nga sai. Dai shaloi na San Pra ai Clare a akyu hpyi ga gaw, “Madu e, nang hpe tsawra ai ni hpe chyahkyawn ni hpe hkum jaw kau e,” nga nna, shi a mama ni hte rau akyu hpyi shaja nga sai rai nga ai. Dai majaw, dumya hpung ni yawng hprawng mat wa masai lam labau hta ka matsing da ai hpe mu hti hka ja lu nga mali ai nu wa ni. Ya na zawn akyu hpyi shaja ai a majaw, San Pra ai Clare gaw, shi a jawng hpe mung, mare hpe mung hkye la lu sai rai nga ai. Dai shani kawn, nhkru nkaja ai ni, manawn masham ni, jahten shaza ai ni n nga, sim sa pyaw ai shara byin nga sai rai nga ai. Nu wa ni, akyu hpyi ai chyeju gaw, mau hpa nan rai nga ai. Shingrai, anhte yawng mung, sak hkrung nga ai prat hkrun lam hta, agung alau, hkrit hpa tsin yam ni hte hkrum hkra wa ai ten ni hta, San Pra ai Clare kaw garum hpyi ga. Karai Kasang hta lai nna, gadai mung hkye la lu na nrai nga ai. Tinang a myit masin hta kaja wa, teng ai makam masham hte, sak jaw ap nawng na sha ahkyak rai nga ai. Shingrai, Nu wa hpu nau ni, San Pra ai Clare gaw, tara shadik let, shi gaw de da ai, Mama Uhpung a matu, shakut nga sai hte, sak kaba wa sai hte rau, Madu a shaning (1252) ning hta Madu kaw yup pyaw ban sa mat wa sai rai nga ai. San Pra ai Clare gade ram du hkra tara shadik shakut mat wa ai i nga jang, ya daini du hkra, “Pour Clare” ngu shamying ai Mama uhpung ni grin nga ding yang rai nga ai. San Pra ai Clare a poi nhtoi hpe Nawku hpung kawn nna, August Shata (11) ya shani ngu, masat da ya sai rai nga ai. Shingrai, dai nhtoi du shagu, lak lai ai shaman chyeju ni hpyi la nga ga law.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.