San Pra ai Charles Lwanga hte Shi Manang ni a Poi Nhtoi (June 3) 03 June 2023

San Pra ai Charles Lwanga hte Shi Manang ni a Poi Nhtoi (June 3)

San Pra ai Charles Lwanga gaw, 1860 ning, January shata praw (1) ya shani shangai chyinghkai wa ai rai nga ai.  

San Pra ai Charles Lwanga  hte Shi a manang ni marai (21) gaw, Uganda Mungdan na Makam Masham a majaw, shawng ningnan si hkam ai ni rai ma ai. Dai mungdan kaw 1879 ning hta White Father Jau Magam Gun Wuhpung ni shawng du nna, Hkawhkam Mtesa up hkang ai aten hta Makam Masham grai kawa wa ai shara tai wa sai. Raitimung, 1885 ning hta shi a hkang kaw hkawhkam Mwanga galai ai shaloi mungdan ting kaw na Hkristan Makam Masham hpe shamyit shatsai kau na matu daw dan wu ai. Shi gaw, la shada shut hkat ai myit jasat rawng nna Hkristan la kasha ni gaw tsep kawp n hkan shatup ya ai majaw, Hkristan makam masham hpe shamyit kau mayu ai rai nga ai.

Dai Hkawhkam gaw, grai mazut ai myit jasat a majaw, Nawku Hpung hpe masum ning tup zingri lai wa ai. Hkawhkam hkaw kata na magam gun ni a ningbaw Lwanga hte shi a manang marai (21) hpe rim la ma ai. Shanhte hpe rim da ai shaloi, Lwanga gaw shi a manang marai (21) hpe “Nanhte a Hkristan makam masham myit galoi du hkra ngang na rai ta?” nga nna san da tai shaloi, shanhte yawng rau sha “Si ten du hkra” nga nna htan ya ma ai.

Shanhte n kau mi hpe hkawhkam a man kaw nan baw kahtam daw sat kau ma ai. Nkau mi hpe gaw n ri hte du kaw galun sat nna nkau mi hpe gaw deng (37) tsan ai shara de dun sa wa n htawm marai masum hpe lam kaw sat kau ma ai. Ngam nga ai ni hpe gaw chyahtai kata gyit hkang nhtawm wan nat sat kau ma ai. Shanhte kaw na shawng nnan sat kau hkrum ai wa gaw, ndai shamyit ai masing woi awn ai shi a kawa hkum nan du kaw gayet sat shangun nna si mat wa nu ai.

Ndai sat kau hkrum ai ni yawng gaw, jahtum e, Madu Yesu a mying gang nna nsa htum mat wa ma ai. Tertullian tsun ai “Makam Masham a majaw si hkrum ai ni a sai gaw, Hkristan Makam Masham a nli tum re.” nga ai ga gaw, jaw dik ai ga rai na ai. Ndai San Pra ai San Pra ai Ramma la kasha ni sat kau hkrum ai hpang laning mi laman Hpung masha marai (200) kawn (500), Makam masham sharin ya ai ni (800) kawn (3000) daram jat wa sai lam labau hta ka da nga ai.

San Pra ai Charles Lwanga  hte Shi a manang ni marai (21) hpe dai zawn rai nna, Makam Masham a majaw sat kau hkrum ai hpang, 1920 ning hta, Dai aten na Wa Sarabyin Benedict (XV) kawn shanhte hpe A lu ai masha dang dat sai rai nga ai.

Dai hpang, 1964 ning, October shata (18) ya shani hta, dai aten na, Wa Sarabyin Pawlu (VI) kawn shanhte hpe San Pra ai Masha hku nna tang dat let, shanhte a poi nhtoi hpe mung, June shata praw (3) ya shani hta masat shagrau dat ya sai rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)