San Pra ai Charbel Makhlouf a Poi Nhtoi (December 24) 24 December 2023

San Pra ai Charbel Makhlouf a Poi Nhtoi (December 24)

San Pra ai Jau Joseph Makhlouf gaw, Lebanon Mungdan, Beqa-Kafra mare kaw 1828 ning, May shata (8) ya shani, makam masham ngang ai Kanu yan Kawa kawn shangai chyinghkai wa ai rai nga ai. Shannu wa ni gaw, Nu Maria hpe grai kam shamyet ai hte Misa Hkungga nawng jau ai Nawku Magam hta grai shakut ma ai.

Shi a asak (23) ning du ai shaloi Shi gaw, Notre-Dame de Mayfouk mying ai Lebanese Moronite Tawra Jau Jawng de shang mat wa ai. Shi a mying hpe Charbel Makhlouf ngu nna shamying la wu ai. San Pra ai Cyprian de K Fifane jau tai jawng kaw laika hpaji sharin la nhtawm ga sadi tawn let 1859 ning hta Jau tai wa sai. Jau tai ai hpang, Shi gaw D’ Anaya ngu ai shara hta e (7) ning magam gun hpai lai wa sai.

San Pra ai Jau Charbel gaw, tara grai shakut ai, grit nem ai myit grai rawng ai hte Chyoi Pra ai Hkum Sakramentu hpe alak mi kam shamyet ai lam ni hta grai mying kaba ai. Bai nna, shi gaw, n dan n dawng ai sha chye nga ai, mayak mang hkang ni hpe hkam sharang ai, madat mara myit maju jung ai, san seng san pra myit jasat ni a majaw, myit grai kaba ai. Jau Charbel gaw akyu hpyi myit sumru yu nga ai shaloi, ga kaw n hkra ai sha hpat wat kaw tsap wa wa rai chye ai mabyin law law lang mung bai lai wa sai rai nga ai.

 Shi a ngam nga ai (23) ning gaw, San Petru hte Pawlu Tawra Jawng kaw magam gun hpai wa nhtawm, 1898 ning, Shi a asak (70) ning, Hkrismat Poi a shawng shani December shata (24) ya shani, dai Tawra Jawng kaw sha, Madu hta e yup pyaw ban sa wa sai rai nga ai.

Jau Charbel n nga mat ai hpang, 1965 ning, December shata (5) ya shani, dai aten na Wa Sarabyin Pawlu (6) kawn Shi hpe A Lu ai Masha ngu masat dat sai rai nga ai.

Dai hpang, 1977 ning, October shata (9) ya shani, dai aten na Wa Sarabyin Pawlu (6) sha, Shi hpe San Pra ai Masha dang dat let, Shi a Poi Nhtoi hpe mung December shata (24) ya shani masat shagrau dat ya sai rai nga ai.

Daini Nawku Hpung gaw, San Pra ai Charbel Makhlouf a Poi Nhtoi hpe galaw nga ga ai aten hta, anhte mung, Wa Jau Charbel hte kanu kawa ni zawn, Nu Maria kam shamyet ai lam, Misa Hkungga nawng jau ai Nawku Magam lam ni hta myit lawm hkum lawm let shang lawm shakut lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)