San Pra ai Cenobiarch Theodosius a Poi Nhtoi (January 11)

San Pra ai Cenobiarch Theodosius gaw, Cappadocia Mungdan, Garissus Mare kaw, lai wa sai A.D (423) ning hta shangai chyinghkai wa ai rai nga ai. Shi kanu yan kawa gaw, makam masham grai ngang ai yan rai nga ai. Dai majaw, shan a kasha Theodosius mung, Ja Chyum Mungga sharin shaga ai hpe sung sung chye myit la na shakut nga chye wu ai.

Cappadocia Mungdan gaw, Madu Yesu nga lai wa ai Chyoi Pra ai Buga (Holy Land) kaw re ai majaw, Shi a wenyi rawt jat lam hta alak mi rai akyu rawng nga wu ai.

Theodosius gaw, kaji ai ten kaw nna laksan tara hkan shatup lu na matu, Yuda Mungdan na, Zaibru Jang de sa nga mat ai. Shi a San Seng San Pra ai myit jasat kasi ni hpe mu nna masha law law mung shi hte arau tara sa shakut let, Tawra Jau sa tai nna nga lai wa ma ai. Dai majaw, Shi hte rau sa nga ai ni a matu, Cathismus mare kaw jawng langai mi gaw gap ya lai wa sai. Dai Tawra Jau ni a nta hte matut nna tsirung langai mi, gumgai dingla ni hpe yu lajang na nta langai, myit n gring ai ni hpe yu gawn lajang na nta langai mi hpe mung gap da ya lai ai.

Theodosius gaw, Shi a bungli rum manang langai mi rai  nga ai, San Pra ai Sabbas hpe Palestine Mungdan ting kaw na Tawra Jau ni a ningbaw lit shatsam ya wu ai. Shi hkum nan mung, dai wuhpung hpe  lam woi nng shawng tai let, sak hkrung nga lai wa sai. Dai majaw, Shi hpe Theodosius Cenobaiarch ngu nna shamying ai rai nga ai. Lachyum gaw, “arau rai nna wuhpung wuhpawng hte nga ai ni a ningbaw ningla wa” ngu ai lachyum rai nga ai.

Jau Kaba Theodosius gaw, Nawku hpung hte seng nna, shut shai ai hku, n htan shi ai hku nna sharin shaga ai ni hpe hkrit tsang myit n ranwg ai sha ninghkap lai wa ai. Dai majaw, Hkawhkam Anastasia gaw, Shi hpe Cenobiarch “Wuhpung Wuhpawng a Ningbaw” nga nna shagrau masat da ya ai hpe dawm la kau ya ai. Raitimung, Hkawhkam Justinian aten hta Shi hpe hkawhkam gaw, dai sharau masat ya ai mying hpe bai jaw shagrau ya nu ai. Dai zawn shagrau hkrum ngut ai hpang, A.D (529) ning du ai shaloi, Madu hta yup pyaw ban sa mat wa sai rai nga ai.

Jau Kaba Theodosius n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, January shata (11) ya shani ngu masat shagrau dat ya sai rai nga ai.

Dai ni, San Pra ai Jau Kaba Cenobiarch Theodosius a Poi Nhtoi hpe galaw nga ga ai aten hta, anhte Hpung Masha ni mung, tinang a manaw manang ni yawng a matu, kasi kaja madun lu ai ni, Madu Yesu hpang de woi sa ya lu ai ni byin tai lu hkra shakut sa wa ga law.

By; Sister Rose Angeline Maran Nang Doi (SFX)

RVA-Kachin Service (Myitkina)