San Pra ai Catherine Laboure a Poi Nhtoi (November 28) 28 November 2022

San Pra ai Catherine Laboure a Poi Nhtoi (November 28)

San Pra ai Catherine Laboure gaw, Fransik mungdan kaw, lai wa sai 1806 ning, May shata praw (2) ya shani shangai chyinghkai wa ai rai nga ai.

Shi gaw, Ma kaji aten kaw nna, Fransik mungdan, Paris mare kaw, “Matsan Dum Lama Amu Gun Mama Wuhpung” (Daughters of Charity) de shang mat wa ai. 1830 ning, Shi a asak (24) ning hta Mama tai jawng num sha naw rai yang, Nu Maria gaw, shi kaw masum lang sa dan pru ai. Shawng nnan lang sa dan pru ai gaw, 1830 ning, July shata (18) ya shani rai nga ai. Nu Maria gaw, Mama ni a jawng na Nawku tawn a pai maga de sa dan pru ai. Dai shaloi Nu Maria gaw, shi hpe yak hkak hkrum wa ai ten, kaning rai, hpa galaw ra ai lam sa tsun dan ai. Matut nna, Nu Maria shi hpe shadum ai lam hta, “Nawku tawn gaw, lam shagu hte seng nnan shalan shabran jaw ya ai shara majing rai nga ai.” ngu nna shadum ai. Bai, shi hpe bungli langai mi jaw na, dai magam bungli galaw ai shaloi grai jam jau hkam ra na lam sa tsun dan ai.

Matut nna, Nu Maria gaw, Jau ni hpe jawm rawt malai ai hte dingbai dingna jaw ai lam byin wa na hte seng nna mung, tau nau tsun dan wu ai. Mang hkang kaba dai gaw, 1870 ning hta Paris mare kaw teng sha byin lai wa sai rai nga ai.

1870 ning, November shata (27) ya shani, Nu Maria gaw, Mama Catherine hpe mauhpa lamik kumla shaman chyeju jaw ya ai dazik langai madun dan ai. Nu Maria gaw, shi hpe madun ai dai dazik “Miraculous Medal” langai mi galaw shangun ai. Bai nna, dai dazik hpe shawa wuhpung hkap la na matu, shi hpe hkaw shabra shangun ai. Ndai mabyin ni a lam shi a wenyi hte seng ai Jau Aladel hta lai nna, kadai hpe mung nchye shangun ai. Ndai mabyin a hpang (45) ning na ai shaloi she, Mama Catherine gaw, shi a ntsa na Mama Kaba ni hpe Nu Maria shi kaw dan pru ai mabyin lam ni yawng bai hpaw tsun dan wa ai.

San Pra ai Mama Catherine Laboure gaw, 1876 ning, December shata (31) ya shani, Madu kaw yup pyaw ban sa mat wa sai rai nga ai.

Shi n nga mat ai hpang, 1933 ning, May shata (28) ya shani gaw, dai aten na Wa Sarabyin Pius (11) gaw, shi hpe Alu ai masha hku nna masat shagrau dat sai.

Dai hpang, 1947 ning, July shata (27) ya shani gaw, dai aten na Wa Sarabyin Pius (12) kawn, shi hpe San Pra ai Masha hku nna dang dat let, Shi a Poi Nhtoi hpe mung, November shata (25) ya ngu masat dat ya sai rai nga ai.

Daini Nawku hpung gaw, San Pra ai Catherine Laboure a Poi Nhtoi hpe galaw nga ai aten, anhte hpung masha ni mung, anhte a sak prat hkrun lam tup hta, Karai Kasang Wa ra sharawng ai lam, Nu Maria hte Madu Yesu ni a ra sharawng ai lam ni hpe hkan sa shatup lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)