San Pra ai Camillus de Lellis a Poi Nhtoi (July 14) 14 July 2023

San Pra ai Camillus de Lellis a Poi Nhtoi (July 14)

San Pra ai Camillus hpe 1550 ning, May shata (25) ya shani, Italy Mungdan, Chieti mare kaw shangai chyinghkai wa ai rai nga ai. Shi a asak (25) ning hta hpai da da nna shi lu ai ja rai yawng sum mat ai majaw, Manfredonia mare na Capuchin Sasana magam gun ni a jawng kaw amu sa galaw mat nu ai. Dai jawng kaw na, Jau Kaba a shading sharai lam madun ya ai majaw myit galai shai wa nna, Karai Kasang a magam gun tai wa sai.

Shi gaw, Capuchin Jau tai mayu ai raitimung, shi a lagaw ana a majaw n hkap la ma ai. Dai majaw, shi gaw mying kaja n lu ai Roma mare San Giacomo tsirung de sa ai. Dai tsirung na magam gun ni gaw, hkrup mara sharin la ai ni re ai majaw, mying grai hten ai ni rai ma ai. Machyi sawng ai ni hpe jahkrung lup kau ai kaw du hkra galaw chye ai ni rai nga ai. San Pra ai Camillus gaw machyi masha ni hpe tsawra myit kaba hte nan yu lajang ya ai majaw, dai tsirung na kaba htum lit gun aya hpe shatsam da ai hkrum nu ai.

San Pra ai Camillus Jau tai wa ai hpang tsirung masha ni hpe laksan yu lajang ai sasana magam gun wuhpung langai mi hpe gaw de hpang dat ya sai. Dai wuhpung shang ni hpe “Camillias” ni ngu shamying ma ai. Shanhte gaw, machyi masha ni hpe Madu Yesu hkum nan hpe yu gawn lajang ya ai ngu myit tawn nna galaw ya ai myit jasat hpe madung tawn ma ai. San Pra ai Camillus gaw, shi a wuhpung hpe “Ginding aga ntsa matsan masha n nga jang, anhte gaw ga kata htum pa de nan sa du nhtawm shanhte hpe sa tam la, sa hkye la ra ga ai.” nga nna ding yang tsun lai wa ai.

San Pra ai Camillus gaw, machyi masha ni a ntsa alak mi nan tsawra myit tawn ai shaman chyeju lu ai; machyi masha ni, si wa maw ai ni hte machyi masha ni hpe yu lajang ya ai amu gun ni hpe grai tsawra chye ai wa mung rai nga ai.  

Ndai zawn, Machyi masha ni hpe yu lakawn ai magam gun nga ai ten, 1614 Ning, July shata (14) ya shani, Madu hta yup pyaw ban sa mat wa sai rai nga ai.

San Pra ai Camillus n nga mat ai hpang, 1742 ning hta, dai aten na Wa Sarabyin Benedict (14) kawn shi hpe A Lu ai masha masat shagrau dat ya sai rai nga ai.

Dai hpang 1746 ning hta, Wa Sarabyin Benedict (14) sha shi hpe San Pra ai Masha dang dat ya let, Shi a Poi Nhtoi hpe mung, July shata (14) ya shani ngu masat shagrau dat ya sai rai nga ai.

San Pra ai Camillus hpe Wa Sarabyin Leo (13) kawn mung, “Machyi masha ni hte Tsirung ni laksan kam shamyet ai San Pra ai Masha” (Patron of the sick and Hospitals) nga nna masat shagrau dat ya sai rai nga ai.

Daini Nawku Hpung gaw, San Pra ai Camillus a poi nhtoi hpe galaw nga ai aten hta, anhte hta hkum hkrang hte wenyi hta byin hkrum hkra nga ai machyi makaw ana ahkya lam ni mahkra hpe, mai tsai wa lu na matu, Karai Kasang hpang de, San Pra ai Camillus kaw hpyi htinglu htinglai ya u ga, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)