San Pra ai Callistus a Poi Nhtoi (October 14) 14 October 2022

San Pra ai Callistus a Poi Nhtoi (October 14)

San Pra ai Sarabyin Callistus gaw, kaji ai prat hta Roma mare kaw mayam tai nna nga kaba wa ai. Shi a mayam prat hta, Madu a gumhpraw hpe sa shamat kau ya nna, hkrit kajawng mat ai majaw Roma mare kaw nna hprawng mat wa ai. Raitimung, shi hpe Ostia hkaleng daru kaw bai lu rim la ma ai. Dai majaw shi hpe Sardinia mungdan na nhprang wan n-ga ju ai nhkun kata kaw amu galaw shangun nna ari jaw ma ai.

Raitimung, Mung up du kaba Commodus hte hku hkau ai Marcia mying ai masha langai mi gaw, Callistus a matu Commodus hpe hpyinem ya ai majaw, dai nhkun kata kaw nna lawt pru wa nu ai.

Dai hpang shi hpe Sarabyin Victor a rung kaw amu galaw shangun ma ai. Sarabyin gaw Sardinia mungdan kaw makam masham a majaw sat kau hkrum lai wa sai masha ni hpe Callistus grai kamhpa ai lam hpe mu chye ya nna grai kabu lawm nga nu ai.

Callistus gaw, Deacon aya hkam la lu ai hpang, Sarabyin Zephyrinus a amu madu aya tang da ai hkrum nu ai. Sarabyin gaw, Deacon Callistus hpe Appian Lam (Appian Way) makau kaw na lupwa hte seng ai lit gun amu hpe mung galaw shangun wu ai. Dai majaw, dai ni na aten hta dai shara hpe “San Pra ai Callistus a Lupwa” (Catacombs of St. Callistus) nga nna shamying da nga ai. Dai Lupwa kaw Sarabyin ni law law a moi mang ni hpe mung makoi mayang da nga ai. Dai lupwa shara gaw, Nawku Hpung shawng nnan tara shang, labau shang madu tawn da lu ai lamu ga shara mung rai nga ai.

Nat dumsa langai mi hpang de, makam masham htak mat ai Hkawhkam Julian ka ai laika hta; “Hkristian hpung masha ni gaw manam shatsam ni a ntsa tawn ai hpunau tsawra myit hte shanhte kaw na si mat ai ni hpe ahkyak tawn nna makoi myang ai myit jasat ni a majaw, shanhte a Hkristian Hpung gaw, grai mying kaba chyam bra nga lu ma ai.” nga nna ka shagun dat nga ai.

San Pra ai Calistus gaw, A.D 217 ning hta Sarabyin aya dang da ai hpe hkrum wu ai. Shi gaw, makam masham htak ai ni hpe ning hkap kau lu ai. Num shaw la shaw ai ni hte masha sat ai ni hpe mara raw ya ai masing hpe mung hpang dang ya sai.

San Pra ai Sarabyin Callistus hpe A.D (222) ning hta masha masham hte seng nna, shi hpe n ju n dawng ai ni e, zingri sat kau masai rai nga ai. Shi a hkum tsawp moi mang hpe Aurelian Lam (Aurelian Way) shara kaw makoi mayang da nga ai.

San Pra ai Sarabyin Callistus n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe October shata (14) ya shani hta shagrau dat ya sai rai nga ai.

Daini, Nawku hpung kaw nna, San Pra ai Wa Sarabyin Callistus a Poi Nhtoi hpe galaw nga ga ai hte maren, anhte a shani shagu na sak hkrung hkawmsa ai lam ni hta, tinang hkam la da lu sai makam masham hpe gwi gwi rip rip sakse hkam lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)