San Pra ai Burgundofara a Poi Nhtoi (April 3) 03 April 2023

San Pra ai Burgundofara a Poi Nhtoi (April 3)

San Pra Burgundofara (Fara) gaw, grai lusu nna ahkaw ahkang kaba lu ai kanu yan kawa kaw na shangai chyinghkai wa ai rai nga ai. Raitimung, shi gaw, Karai Kasang shaga nna Hpung magam gun tai na matu lata la nu ai. Shi gaw, Fransik Hkawhkam Theodore (2) a ginwang uphkang salang kaba Ageric a kasha jan rai nga ai. Kaji ten kaw nna Fara gaw, Karai Kasang shi hpe Hpung Magam gun tai shangun ai hpe na lu nna grai tai mayu ai raitimung, Kawa gaw grai pawt let hkum pat wu ai. Kasha jan mung ahkang jaw na matu akroi anoi hpyi nem wu ai. Shan wa a lapran na myit n hkrum ai mang hkang a majaw, shi a hkamja lam grai hkra wa nu ai. Shi a hkam kaja lam a matu, Fara gaw, San Pra ai Eustace kaw garum akyu hpyi wu ai. San Pra ai Eustace a garum akyu hpyi ya ai a majaw, Fara hkam kaja lam bai la lu wa wu ai.

Fransik mungdan a hkawhkam gaw, Fara a myit hpe hkan shatup ya nu ai. Fara a san seng san pra ai myit jasat hpe grai n gun jaw ai; Fara hte shi a manang jan ni a matu Mama Jawng langai mi gaw gap ya sai. Mama Fara gaw, dai Mama jawng kaw Mama kaba lit hkam magam hpe shaning (37) ning tup, gun hpai lai wa sai rai nga ai. Shi a myit jasat a majaw, shi a uphkang ai lam grai awng dang nu ai. Shi a ngang kang ai makam masham myyit hte kasi kaja ni a majaw, amyu shayi law law, Madu Yesu hpang hkan kaja ni tai wa lu masai.

Mama Fara woi awn ai Mama Wuhpung Magam Gun ni hpe “Evoriacum” nga nna shamying ma ai; hpang daw de gaw, shi hpe shagrau nna, “Benedictine Abbey of Faremoutiers” nga nna galai shamyit kau ma ai.

Mama Fara gaw, Madu a shaning (656) ning, April shata praw (3) ya shani hta Madu kaw yup pyaw ban sa mat wa sai rai nga ai. 

Shi n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, April shata praw (3) ya shani masat shagrau dat ya sai rai nga ai.

Daini Nawku Hpung gaw, San Pra ai Burgundofara a Poi Nhtoi hpe galaw nga ga ai aten hta, anhte marai hkum shagu mung, San Pra ai Burgundofara zawn, anhte a sak prat hkrun lam hta Karai Kasang Wa a shaga la ai nsen hpe atsawm sha madat hkam la let, Shi Madu Karai Wa myit ra sharawng ai hkrun lam hta, hkawm sa lu hkra shakut sa wa ga ngu, n gun jaw dat lu n ngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)