San Pra ai Brendan a Poi Nhtoi (May 16) 16 May 2023

online image

San Pra ai Brendan a Poi Nhtoi (May 16)

San Pra ai Brendan gaw, Ireland Mungdan, Sinna maga kaw lai wa sai A.D (484) ning hta, shangai chyinghkai wa ai rai nga ai. Shi gaw, Makam Masham ru jung ai hte Makam Masham lam hkan sa shatup ai Kanu Kawa ni a lapran ngai kaba wa ai, dai majaw shi kaba wa ai shaloi makam masham myit grai jung mat sai rai nga ai.

Shi naw kaji nga yang, San Pra ai Ita kawn yu lakawn ai hpe hkrum nhtawm, Saradaw Erc a man kaw nga kaba wa ai. Shi gaw, Tawra Jau ni a laika sharin jawng kaw laika sharin la ngut ai hpang, Saradaw Erc gaw, shi hpe Jau Shatai Sacramentu hpe jaw ya sai rai nga ai.

San Pra ai Brendan gaw, A.D (559) ning hta shi hpaw hpang ai Clonfert Mare kaw na Tawra Jau Jawng kaw Jau Kaba ya dang da ai hkrum nu ai. Shi ka lajang da ai Tawra Jau ni a hkan shatup ai rit kawp tara hpe e lamu kasa kawn shi hpe matsun ya nna ka da ai re, nga nna tsun jahta ai lam nga ai. Wenyi ni a matu n sim n sa shakut ai; shi hkum hpe Karai Kasang kaw aten tup ap da nga ai. Dai majaw, shi gaw shani shagu san pra jat wa ding yang rai nga ai. Shi a san seng san pra ai kasi hpe mu nna masha ni law law Hpung Magam gun ni tai wa ma ai; Shi hte rau Tawra Jau Marai Hkying Masum magam gun ni tai wa sai.

San Pra ai Brendan gaw, A.D (577) ning hta, Madu kaw yup pyaw ban sa mat wa sai rai nga ai.

Shi n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, May shata (16) ya shani ngu masat shagrau dat ya sai rai nga ai.

Dai majaw, shaning shagu May shata (16) ya shani hta, Ireland Mungdan ting shi hpe hkungga jaw poi galaw shagrau ya ma ai.

Daini Nawku Hpung gaw, San Pra ai Brendan a Poi Nhtoi hpe galaw nga ai aten hta, anhte hpung masha ni mung, Karai Kasang Wa anhte hpe matsun nga ai magam bungli ni hpe dinghta asak naw nga ai aten tup hkrak hkan sa shatup lu ai ni byin tai lu hkra shakut sa wa nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

Add new comment

8 + 4 =