San Pra ai Boniface a Poi Nhtoi (June 5) 05 June 2023

San Pra ai Boniface a Poi Nhtoi (June 5)

“Germany Mungdan a Kasa” San Pra ai Boniface gaw, Madu a shaning (673) ning hta England Mungdan, Crediton mare kaw shangai chyinghkai wa ai rai nga ai. Shi a asak (5) ning hta shanhte nta de sa du ai Jau ni jahta ai ga hpe na la nna Karai Kasang a Magam Gun tai mayu ai myit rawng wa nu ai. Shi gaw, Nursling Mare na Benedictine Tawra Jau de shang mat ai hte hpang daw de dai Jawng hpe yu gawn na matu lit shatsam ai hpe hkrum nu ai. Shi a hpaji machye machyang ning tawn ai majaw, hpaji chye ai masha ni law law shi kaw du sa wa ma ai. Dai zawn du sa wa ai ni a matu, myit kaba ai “Latin Grammar” laika hpe shi hkum nan ka lajang da ya wu ai. Shi Jau tai wa ai hpang Chyum Laika hpe madung tawn nna hkaw shabra ai lam ni galaw wa sai.

Madu a shaning (718) ning hta Wa Sarabyin Greogry (2) gaw, Jau Boniface hpe Germany Mungdan kata Ja Chyum Mungga hkaw matsun shabra na lit shatsam yaw u ai. Shi gaw, tara maigan ni “Tak Nna Kamhpa ai” Gudenberg Bum Ntsa na Donar nat a numshang shatai ai wa mi hpun hpe kran kau wu ai. Shaloi tara maigan ni gaw, Jau Boniface kade nna yang nat ni e ari jaw da katut na ra ai, nga nna kam nga ma ai. Raitimung, Jau Boniface hpa n byin ai shaloi, shanhte gaw, shanhte shawng de grai kam kaba lai wa ai nat gaw, “Hpa Lachyum N Pru, Shanhte Nat Numshang hpe Pyi n maga lu a hka!” nga nna myit malai lu shajang mat ma ai.

Dai mabyin a hpang, Jau Boniface woi awn ai makam masham bungli ni grai awng dang wa ai; Nawku Jawng hte Jau, Mama Jawng ni law law hpe mungdan ting kaw lu gap tawn sai rai nga ai. Wa Jau Boniface a atsam hpe shagrau nna, Wa Sarabyin Gregory (3) gaw, Wa Jau hpe Mainz mare na Saradaw hte Germany Mungdan ting a Saradaw Kaba aya dang dat ya wu ai. Shi a ngam nga ai sak hkrung aten tup Saradaw Biniface gaw, Netherland Mungdan na tara maigan ni hpe makam masham hkaw shabra ya sai.

Madu a Shaning (754) ning, June shata (5) ya shani hta Dohkum Mare na Shi a gawk kata kaw manang ni hte asim shara laika hti nga shaloi, tara maigan masha wuhpung ni e sa sat kau ai hpe hkrum lai wa sai rai nga ai. Shi a hkum tsawp moi mang makoi mayang da ai Fulda Nawku Jawng kata kaw shi sat kau hkrum ai aten shi a Baw ntsa sharawt tawn da ai Laika Buk hpe mung mazing tawn da ma ai. Dai Laika buk hta nhtu hkang hte Shi a sai naw kap taw nga ai. 

Saradaw Boniface n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, June shata (5) ya shani hta masat shagrau dat ya sai rai nga ai.

Daini Nawku Hpung gaw, San Pra ai Wa Saradaw Boniface a Poi Nhtoi hpe galaw nga ga ai aten hta, anhte Hpung Masha ni mung, Wa Saradaw Boniface zawn, anhte lu da sai Makam Masham hpe tinang a asak htum ai shani du hkra sak se hkam, hkawmw matsun lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)