San Pra ai Blasé a Poi Nhtoi (February 3)

San Pra ai Blasé hpe mayu chyahkraw machyi makaw ai hte seng nna kam shamyet ai sanpra ai masha hku nna masat let hkungga jaw nga ai re. Shi gaw, Armenia mungdan na lusu ai kanu kawa ni kaw nna shangai chyinghkai wa ai rai nga ai. Hkristan hpaji hta kung zet wa ai hte shi gaw tsi sarawun tai wa sai. Dai hpang, shi Jau tai wa ai. De a hpang gaw, Armenia mungdan kaw na Sabaste mare na Saradaw aya tang da hkrum sai rai nga ai.

Mung up du Licinius gaw, makam masham hpung ni hpe zingri zingrat sat shamyit wa ai shaloi, Saradaw Blasé gaw nam maling na lungpu hku langai mi kaw sa makoi rawng nga mat ai. Dai shara gaw matse labye dusat ni sha nga ai shara rai nga ai. Dai matse labye dusat ni hpe shi shaman ya ya rai wu ai.

Lani mi hta shawa hpawng kaw masha shada gamu sat hkat ai shara a matu, jau gawng ni gaw matse labye ni hpe sa tam yang, nam maling kata kaw Saradaw hpe sa mu ma ai. Shanhte gaw, Armenia mungdan kaw lit magam gun hpai ang ai Roma hkawhkam a malai wa Agricolaus hpang de Saradaw hpe dun wa ma ai. Shi hpe htawng kata kaw bang na matu woi sa wa ai lam hta du kaw nga ju ju ai majaw, si wa na daram machyi hkrum nga ai la kasha langai mi hpe shi a kanu woi sa wa ai hte hkrum katut nu ai. San Pra ai Blasé akyu hpyi ya ai majaw, kasha gaw shaloi jang tsep kawp mai mat wa ai. Dai aten kaw nna, San Pra ai Blasé hpe mayu chyahkraw hte seng ai machyi makaw a matu kam shamyet let akyu hpyi shaja hpang wa ai gaw, daini na aten du hkra rai nga ai.

San Pra ai Saradaw Blasé gaw, shi a makam masham a matu zingri zingrat shatsang ai hpe kamsham myit kaba hte hkam sharang lai wa sai. Jahtum e shi hpe gyit hkang tawn nhtawm hpri ju ni hte mahkyit shatsang ai hpang shi a baw hpe kahtam daw sat kau ma ai.

San Pra ai Saradaw Blasé n nga mat ai hpang, Nawku hpung gaw, shi hpe San Pra ai masha dang dat let, shi a Poi Nhtoi hpe February shata praw (3) ya shani masat shagrau dat ya sai rai nga ai.

San Pra ai Blasé hpe myit dum hkungga jaw ai poi shani hta, Jau gaw, Wan shadaw lahkawng hpe Wudang zawn jum tawn nhtawm, Hpung masha ni a mayu kaw matep da nna; “Makam a masham a majaw si hkam ai San Pra ai Saradaw Blasé a akyu hpyi htinglu ya ai a marang e, nang kaw nna mayu hte seng ai machyi makaw amyu myu hte kaga n hkru n kaja ai lam ni yawng kaw na, Karai Kasang nang hpe hkye mawai la u ga law, Kawa, Kasha, Chyoipra ai Wenyi a mying ningsang hte, Amen.” nga nna akhyu hpyi shaman ya ai lam rai nga ai.

Daini Nawku hpung gaw, San Pra ai Saradaw Blasé a Poi Nhtoi hpe galaw nga ai aten hta, anhte hta byin hkrum hkra nga ai ana ahkya ni hpe shamai shatsai ya rit na matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)