San Pra ai Bibiana a Poi Nhtoi (December 2)

San Pra ai Bibiana gaw, makam masham hpe grai hkan shatup ai kanu yan kawa kawn shangai wa ai rai nga ai. Shi a tsawra ai kanu hte kawa yang aw, A.D (363) ning hta Roma Hkawhkam Apronianus e Hkristan Makam Masham a jaw sat kau ai hpe hkrum lai wa masai.

Mungdan uphkang ai wa gaw, Hkristan masha ni hpe, masham masham nyet kau shangun ai. Hkawhkam gaw, Roma Hpyen Dap kaw na share shagan hpyen kaba “Knight” rai nga ai Baibiana a Kawa Flavian hpe rim la nhtawm, zingri shatsang ai hpang shara kaga de htawt kau ya nna kade nna yang du kaba Flavian si mat wa ai. Bibiana a Kanu Dafrosa hpe mung zingri ai hpang du kahtam di nna sat kau ma ai.

Hkawhkam gaw, Bibiana a Kanu yan Kawa madu da ai sutgan ni yawng hpe mung zing la kau ya wu ai. Dai majaw, Bibiana hte shi a kanau Demetria yang aw, matsan mayan re ai prat kaw nga kaba wa ma ai. Shan nau hpe mung dingbai dingna grai jaw ma ai; raitimung, shan nau gaw, makam masham hpe ngang kang ai hte ding yang shatup hkan sa ma ai. Shan nau a nta masha ni hpe lusha gam jaw nna akyu hpyi shajat let aten shalai nga ma ai.

A.D (360) Ning hta, Mung up du Apronianus gaw, shan nau hpe shi hpang de shaga la nhtawm, makam masham nyet kau na matu jahkrit shama shatsang ai; Kanau Detetrius gaw, matsan nna lusha atsawm n lu sha ai majaw n gun grai kya mat wa nu ai. Raitimung, makam masham hte seng nna hkawhkam a man kaw nan myit shaja tawn nga yang, n gun n rawng mat nna kadawng wa ai ta, dai shara kaw nan nsa hti mat wa sai rai nga ai.

Bai nna, Hkawhkam wa gaw, kana jan Bibiana hpe mung grai n kaja ai num jan langai mi a lata de ap kau dat wu ai. Dai num gaw, Bibiana hpe n se n sa lam hte seng nna agung alau amyu shagu jaw taw ai; matsat shabat rai nna mung galaw dan ai. Bibiana chyawm gaw, makam masham hta ngang ngang tsap let myit shaja taw da wu ai. Dai majaw, Hkawhkam wa gaw, Bibiana hpe gyit nhtawm kayat shatsang shangun ai; zingri ai shangun ma ni gaw, hpri sumri kaba ni hte kayat shatsang ma ai. Raitimung, Bibiana gaw, akyu hpyi let ndai zingri shatsang ai hpe kabu gara hkam la ai hpang nsa hti mat wa sai rai nga ai.

San Pra ai Bibiana, shi n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, December shata praw (2) ya shani, masat shagrau dat ya sai rai nga ai.

By;
Sister Rose Angeline Maran Nang Doi (SFX)
RVA-Kachin Service (Myitkyina)