San Pra ai Bertille a Poi Nhtoi (November 6) 06 October 2023

San Pra ai Bertille a Poi Nhtoi (November 6)

San Pra ai Bertille gaw, Fransik Hkawhkam Dagobert (I) a lak hkak hta Soisson mare hta shangai chyinghkai wa ai rai nga ai. Shi gaw, A.D 630 ning hta Jouarri mare na, Mama jawng kaw sa nga lai wa sai. Shi a nsam hpe masha ni yawng grai yu sharawng, shakawn ma ai. Dai majaw, shi gaw asak grai naw kaji timung, machyi masha ni kaw sa du gawan ai, jawngma ni hpe yu gawn ai, manam hkalum ai lam tha grai kam ai majaw, shi hpe dai lit ni hpe shatsam da ma ai. Shi galaw ra ai amu bungli ni hpe ra n rawng hkra galaw ai majaw, Mama ni yawng hpe up hkang ai Mama kaba a ningtau lit shatsam ya ma ai.

Chelles mare kaw na, Mama jawng hpe San Pra ai Clotildis hpaw hpang da nna, Hkawhkam Clovis (II) a madu jan rai nga ai, San Pra ai Brthildis matut galaw shakre lai wa ai. San Pra ai Hkaw hkam jan Bartildis gaw, Jouarre mare kaw magam gun nga ai, Mama kaba hpang de, shi n gun dat nna gap da ya sai Chelles mare na, Mama jawng hpe woi awn na Mama hpe sa hpyi ai. Shaloi Mama kaba gaw, San Pra ai Bertille woi awn ai Mama Wuhpung hpe hpaw hpang dat ya sai rai nga ai. Dai majaw, San Pra ai Bertille gaw, A.D 646 ning hta Chelles mare na, Mama jawng kaw Mama kaba tai wa sai.

Mama kaba Bertille a San Pra ai myit jasat hte shawa hpe up hkang ai atsam madang grai tsaw ai hpe mu lu nna, East Angles mare na Hkawhkam Jan Hereswith hte Chelles mare na hkawhkam jan Bartildis yan gaw, A.D 665 ning hta, Mama tai mat wa masai. San Pra ai Bertille gaw, shaning (46) ning tup Mama ni hpe lani hte lani grau nna shagrit shanem dan ai, aten tup kabu gara nsam madun ai, asak kaba nna bungli galaw yak timung shakut galaw ding yang rai nga ai. San Pra ai Bertille gaw, A.D 692 ning hta Madu kaw yup pyaw ban sa mat wa sai rai nga ai. 

Shi n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, November shata (6) ya shani, masat shagrau dat ya sai rai nga ai.

Daini Nawku Hpung gaw, San Pra ai Bertille a Poi Nhtoi hpe galaw nga ga ai aten, anhte a prat hta mung, Mama Bertille zawn, kaning re ai magam bungli hta raitim, sadi dung kang ka let galaw shakut hkawmsa lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)