San Pra ai Bertille a Poi Nhtoi (November 6)

San Pra ai Bertille gaw, Francik Hkawhkam Dagobert (I) a lak hkak hta Soisson mare hta shangai chyinghkai wa ai rai nga ai. Shi gaw, A.D 630 ning hta Jouarri mare na, Ma Ma jawng kaw sa nga lai wa sai. Shi a nsam hpe masha ni yawng grai yu sharawng, shakawn ma ai. Dai majaw, shi gaw asak grai naw kaji timung, machyi masha ni kaw sa du gawan ai, jawngma ni hpe yu gawn ai, manam hkalum ai lam tha grai kam ai majaw, shi hpe dai lit ni hpe shatsam da ma ai. Shi galaw ra ai amu bungli ni hpe ra n rawng hkra galaw ai majaw, Ma Ma ni yawng hpe up hkang ai Ma Ma kaba a ningtau lit shatsam ya ma ai.

Chelles mare kaw na, Ma Ma jawng hpe San Pra ai Clotildis hpaw hpang da nna, hkawhkam Clovis (II) a madu jan rai nga ai, San Pra ai Brthildis matut galaw shakre ai. San Pra ai hkaw hkam jan Bartildis gaw, Jouarre mare na, Ma Ma kaba kaw shi n gun dat nna dap da ya ai Chelles mare kaw na Ma Ma jawng hpe woi awn na Ma Ma hpe hpyi ai. Shaloi Ma Ma kaba gaw, San Pra ai Bertille woi awn ai Ma Ma wuhpung hpe hpaw hpang dat ya sai. Dai majaw, San Pra ai Bertille gaw, A.D 646 ning hta Chelles mare Ma Ma jawng kaw Ma Ma kaba tai wa sai.

Ma Ma kaba Bertille a San Pra ai myit jasat hte shawa hpe up hkang ai atsam madang grai tsaw ai hpe mu lu nna, East Angles mare kaw na hkawhkam jan Hereswith hte Chelles mare na hkawhkam jan Bartildis yan gaw, A.D 665 ning hta, Ma Ma tai mat masai. San Pra ai Bertille gaw, shaning (46) ning tup Ma Ma ni hpe lani hte lani grau nna shagrit shanem dan ai, aten tup kabu gara nsam madun ai, asak kaba nna bungli galaw yak timung shakut galaw ding yang rai nga ai. San Pra ai Bertille gaw, A.D 692 ning hta Madu kaw yup pyaw ban sa mat wa sai rai nga ai.  

San Pra ai Bertille a Labau Kadun hpe hti hkaja la let, anhte prat hta mung, kaning re ai magam bungli hta raitim, sadi dung kang ka let galaw shakut hkawmsa lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)