San Pra ai Bernward a Poi Nhtoi (November 20)

San Pra ai Bernward gaw, Germany Mungdan, Saxony mare kaw na rai nga ai. Shi grain aw kaji ai aten kaw nna, kanu yen kawa n nga mat sai. Dai majaw, shi hpe Netherland Mungdan, Utrech ginwang, Volkmar mare na shi a Kawa di rai nga ai, Saradaw kawn yu bau maka wa ai rai nga ai.

Shi gaw, Chyahkrai ma raitimung, kaji ai aten kaw nna Hkristian makam masham hte laika hpaji masa ni rau nga kaba wa ai. Shi gaw, laika hpaji gara n sharin ngut, Jau tai jawng jahpan de garai n shang lu ai aten kaw nna, Jau shatai ya hkrum sai rai gna ai.

A.D 987 ning hta, shi gaw, Ma prat kaw nna, hkawhkam lit hkam aya dang da hkrum ai Otto (III) a hkawhkam kasha hpe laika sharin ya ai sara shatai hkrum sai. A.D 993 ning hta, shi gaw Hildesheim mare kaw na Saradaw tai wa nna, masha ni a matu san seng san pra ai kasi, shawa a matu ap awng myit jasat kasi tai wa sai.

Hpung masha ni hpe hpaji ladat hte mung, shi a chye tau ai myit jasat hte mung up hkang lam woi chye ai. Hpung masha ni gaw, shanhte sa saradaw a san pra ai myit jasat hpe sha n-ga, lata hpaji lam hta magrau grang ai hpe mung, mu chye ya ma ai.

Saradaw Bernward gaw, hpri rai hte mawn sumli ai hpaji hte, gaw gap hpaji hta grai ning tawn ai. San Pra ai Michael Nawku Htingnu hte Jau a nta hpe shi gap da tai rai nga ai. Saradaw lit hpe (30) ning gun hpai lai wa ai hpang, Benedictine Jau Sasana Wuhpung de shang mat wa ai. Dai Tawra Jau wuhpung de shang wa ai nhtoi kaw nna, shi a prat tup ra sharawng nga ai asim sha nga let, tara shakut na matu Wenyi lam hta grau lajang la lu mat nu ai.

Ndai zawn rai wenyi lam hta shakut nga ai aten, 1022 ning, November shata (20) ya shani hta Madu kaw yup pyaw ban sa mat wa sai rai nga ai.

Shi n nga mat wa ai hpang, 1193 ning hta, Wa Sarabyin Celestine (III) gaw, San Pra ai masha hku nna dang dat let, shi a Poi Nhtoi hpe November shata (20) ya shani ngu masat da ya sai rai nga ai.

San Pra ai Bernward a labau kadun hpe hti hkaja la let, anhte a prat hta mung, tinang myit sharawng ai lam hpe Karai Kasang Wa hta manoi manat ap nawng akyu hpyi let, sak hkrung hkawmsa nga ga law.

By;
Sister Rose Angeline Maran Nang Doi (SFX)
RVA-Kachin Service (Myitkyina)