San Pra ai Bernard a Poi Nhtoi (August 20)

Clairvavux Jau jawng na Jau Kaba ai San Pra ai Bernard gaw, Francis Mungdan, Fontaines mare kaw 1090 ning hta shangai chyinghkai wa ai; kanu kawa ni gaw sari shingkang rawng ai masha kaba ni rai ma ai. Shi a asak (22) ning du nna akyu hpyi nga ai lani mi hta, Citeaux mare na Cistercian Tawra Jau jawng de shang na matu, Madu shaga ai nsen na dat wu ai. Shi a myit pyaw dik nsam hpe mu nna shi a kahpu kanau ni, makyin jinghku ni, manaw manang ni marai (30) gaw, Tawra jau jawng de shi a hpang hkan nang shang mat ma ai.

Dai hpang masum ni na ai shaloi Jau Bernard hte Tawra Jau marai (12) hpe Clairvaux shara kaw jawng hpaw na matu lit shatsam dat ma ai. Clairvaux gaw, Wormwood Prang na nam maling kaba nga ai shara re. Shi a san seng san pra ai myit jasat kasi mu nna shi a kawa hte marai (130) gaw Tawra Jau tai wa ma ai. Galang mi na shi a ngang gayut ai myit agung alau hpe gasat ai hku nna, shi a hkum hpe hka ge zawn katsi ai hka kata gumhtawn bang ga ai.

San Pra ai Bernard akyu hpyi ya ai majaw, lamik kumla law law byin yu sai. Galang mi, ma a ai salang langai mi si wa mahka e shi a mara raw lu na matu, shi hpe Bernard gaw ga lu shaga ai lamik kumla shabyin ya ai. Foigny Nawku jawng kata hpring hkra sen kaba re ai ji nu ni hpe Jau Berard akyu hpyi nna shachyut shapraw ga tsun ai shaloi jang, dai ni hprawng pyen mat wa ma ai. San Pra ai Bernard a mying kaja shiga nau mawng ai majaw, hkawhkam ni, Sarabyin ni kaw na hkawt shi kaw hpaji sa hpyi ma ai. Shi a san seng san pra ai myit jasat hte hpaji machye machyang, shi ka ai laika ni hpe Nawku Hpung a tai hpyen ni mung grai mau, grai shakawn lai wa ma ai.

1144 ning hta, Sarabyin Eugene (II) gaw, Jau Bernard hpe Crusade Majan (II) woi awn na matu lit shatsam sai. Shi a myit sharawt ga ni manu dan la ai majaw, Hkristian Hpung masha law law Chyoi Pra ai Buga (Holy Land) de majan je sa ma ai. Rai timung, ndai majan hta tsun n tsawm hkra sum mat ma ai. Ndai hpe yu nna, san pra ai masha ni mung galang lang bungli galaw shut chye ai lam sharin hkaja la lu nga ga ai. San Pra ai Bernard gaw, 1153 ning, August shata (20) ya shani hta Madu kaw yup pyaw ban sa mat wa sai rai nga ai.

Shi a Poi Nhtoi hpe Nawku hpung gaw shaning shagu August shata (20) ya shani galaw ya nga ga ai re. Anhte hpung masha ni mung, San Pra ai Bernard a kasi ningli hpe la nna, san seng san pra ai myit masin hte Karai Kasang Wa hpe nawku daw jau ai sha n-ga tinang a maku grup yin manaw manang ni a matu mung, kasi la gying mai ai ni byin lu hkra galoi mung shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)