San Pra ai Bernadetta Soubirous a Poi Nhtoi & Lourdes Mare Kaw Nu Maria Dan Pru ai Mabyin (February 11) 11 February 2023

San Pra ai Bernadetta Soubirous a Poi Nhtoi & Lourdes Mare Kaw Nu Maria Dan Pru ai Mabyin (February 11)

          San Pra ai Bernadetta Soubirous gaw, Fransik Mungdan (Yan a Pyin Thit) Mungdan na, Lourdes mare kaw, lai wa sai 1844 ning, January shata (7) ya shani hta shangai chying hkai wa ai rai nga ai. Shi a kanu yan kawa gaw, matsan ai ni rai ma ai.

1858 ning, February shata (11) ya shani, Bernadetta gaw, shi a manang jan hte rau Cave (Kawe) ngu ai Hka Kau kaw hpun sa hta nga ma ai shaloi, laru kaba ru wa ai hte, dai yang na lungpu ting htoi tu kabrim wa ai. Bernadetta gaw, hkum Shing-yan grai tsawm ai num sha langai mi hpe mu nu ai. Dai Numsha gaw, hpraw tu tsawm ai buhpun palawng hte mawn sumli da nhtawm, nshang kaw shingkyit kyit da nga ai; shi a lata hta gaw, Rosary hkachyi lang da nga ai; shi a lagaw ntsa numri pan lahkawng mara nga ai.

Dai hpraw tsum la ai num jan gaw, mani sumsai rai shi hte rau Rosary akyu hpyi na matu Bernadetta hpe shaga wu ai. Bernadetta hpe matut mayang rai dai shara de san a matu hte shut hpyit mara galaw ai ni myit malai lu na matu, akyu hpyi ya na hte dai shara kaw Nawku Jawng gap na matu, Ginwang-up Jau hpe wa tsun shangun ai. Bai nna, dai kakau kaw na mauhpa hka hpawk byin pru wa nna, dai hka hpe lu shangun wu ai. Dai Num jan hpe Bernadetta mying san yu ai shaloi shi gaw, “Ngai gaw, npawt shut hpyi mara n kap ai sha na-um na-sin wa ai wa rai n ngai.” (I am the Immaculate Conception). Nga nna bai htan ya wu ai.

Bernadetta gaw, 1866 ning hta Nevers Mare kaw na, Charity Mama Magam Gun Wuhpung (Sisters of Charity) kaw shang mat wa nu ai. Shi a Mama ni gaw, Bernadetta a shagrit shanem ai myit hte hkam sharang myit jasat ni hpe grai nan yum au ya ma ai. Lani mi hta, shi a manang ni gaw, Nu Maria shi kawn dan pru ai mabyin a lam san yu ma ai. Shaloi Bernadetta gaw; “Dai mahkawn jan gaw maza ni hpe ye jasan kau na matu, ngai hpe ding ye shatai ai she re. Yeng seng ye shatsai ngut jang ding ye hpe chyinghka shingdu kaw tawn ai hkrai rai nga ga ai.” ngu nna bai htan ya ai.

San Pra ai Bernadetta gaw, 1879 ning, 1879 ning, April shata (16) ya shani, shi a asak (35) ning hta Rosary akyu hpyi taw nga ai ten hta Madu kaw yup pyaw wa sai rai nga ai.

Shi n nga mat ai shaning (29) ning na ai hpang 1908 ning hta shi a moi mang hpe bai hpaw yu ai shaloi, shi a hkum shan ni gaw, n hten n yat ai sha majing malang rai nna nan bai mu lu ma ai sha n-ga, shi a nsen ni gaw, mani sumsai rai tsawm taw nga ai hpe mu lu ma ai.

San Pra ai Bernadetta Soubirous gaw, 1879 ning, April shata (16) ya shani, Madu hta yup pyaw wa sai rai nga ai.

San Pra ai Bernadetta Soubirous n nga mat ai hpang, 1925 ning, June shata (14) ya shani hta dai aten na, Wa Sarabyin Pius (XI) kawn Shi hpe A Lu ai Masha ngu nna, masat shagrau dat ya sai rai nga ai.

Dai hpang, 1933 ning, December shata (8) ya shani hta gaw, Wa Sarabyin Pius (XI) sha, Shi hpe San Pra ai Masha dang dat ya sai rai nga ai.

Daini Nawku Hpung gaw, San Pra ai Bernadetta Soubirous a Poi Nhtoi Shani hta e, Shi hpe dan pru dan ai shara kaw galaw da ai Lourdes Nu Maria Poi hpe mung galaw nga ga ai re. Dai Lourdes Mare na Nu Maria Lungpu hpe e, San Pra ai Bernedetta hpe Nu Maria htet da ai hte maren gaw gap da ai rai nga ai. Dai majaw, Shaning shagu, February shata (11) ya shani hta, masha sen lam kaba gaw, Pyin Thit Mungdan, Lourdes Mare de sa nna, Nu Maria hpang de sa du akyu hpyi let, mau hpa hka hpawk kaw na hka lu ai majaw, hkum hkrang myit masin wenyi hkamja lam hpe lu la shajang nga ai re.

Raitimung, anhte hpung masha ni marai hkum shagu, dai Lourdes Nu Maria Lungpu de n lu sa du ai re majaw, grau nna anhte Myanmar Mungdan a matu gaw, Dai Lourdes Nu Maria Lungpu na Lagrwi Lagraw (Relic) bang tawn da ai, Nyaung Laybin Lourdes Nu Maria Poi hpe shaning shagu galaw let, hpung masha ni sa du shang lawm shaman chyeju hkam la nga ai re. Dai zawn re ai Lourdes Nu Maria Lungpu gaw, Nyaung Lay Bin kaw sha n rai, kaga Saradaw ginwang ni hkan mung nga nga ai re. Anhte Myitkyina Saradaw Ginwang a matu nga jang, Dai Lourdes Nu Maria Lungpu na Lagrwi Lagraw (Relic) bang tawn da ai, Tang Hpre Mare, Sumsing Lamu a Hkawhkam Jan Nawku Jawng Wang na, Lourdes Nu Maria Poi hpe shaning shagu February shata (11) ya shagu wu wu di di rai galaw nga ga ai re. Raitimung, 2011 ning a hpang daw de gaw, mung masa n pyaw ai hte hpawn, grai rau nna grak lagra n lu galaw wa nga ai kaw, lai wa sai 2019 ning kawn byin hpang wa ai, COVID-19 ana zinli a majaw grau nna, moi na zawn wu wu di di rai n lu galaw mat wa nga sai.

Kaning re ai masa hte katut hkrum sha nga ga ai raitim, daini na San Pra ai Bernadetta Soubirous a Poi Nhtoi & Lourdes Mare Na Nu Maria a Poi Nhtoi Shani hta, anhte hpung masha ni mung, tinang du nga ai shara kaw na, Nu Maria hpang de alak mi akyu hpyi la nhtawm, tinang a hkum hkrang hta byin nga ai machyi makaw lam ni yawng hpe shamai shatsai hkam la nga ga law.  

By;

Sister Rose Angeline Maran Nang Doi (SFX)

RVA-Kachin Service