San Pra ai Benjamin a Poi Nhtoi (March 31) 31 March 2023

San Pra ai Benjamin a Poi Nhtoi (March 31)

San Pra ai Benjamin gaw, Persia mungdan hta nga lai wa ai. Persia mungdan gaw, moi shawng de Hkristan masha ni grai nga pyaw ai share raitimung, shi a aten hta gaw, Hkristan hpung masha ni hpe laja lana rai sat zingri shamyit taw ai aten rai nga ai. Ndai zawn rai sat zingri shamyit ai lam gaw, myit n su ai Saradaw Abdas a majaw rai nga ai. Shi gaw, Persian amyu sha ni manu shadan hkungga la ra dik ai Wan Nawku Htingnu “Temple of Fire” sa nat kau ya ai majaw rai nga ai. Mungdan hkawhkam wa gaw, shanhte a nat numshang hpe bai n gap ya jang, Hkristan ni a Nawku jawng nga manga hpe nat kau ya na nga nna tara jahkrat dat wu ai. Dai hpe Saradaw Abdas n hkan shatup ya ai majaw, shi hpe sat kau ma ai. Tara jahkrat da sai hte maren, Hkristan Nawku jawng ni yawng hpe jahten kau ai sha n-ga Hkristan hpung masha ni hpe shaning (40) ning tup zingri shamyit shatsang lai wa ma ai.

Ndai zawn, Hpung masha ni zingri sat kau hkrum ai kaw, San Pra ai Benjamin mung malawm langai mi rai nga ai. Constantinople hkawhkam a dat kasa lapran salang tai nna shanga ya ai majaw, San Pra ai Benjamin sat hkrum na kawn lawt lu sana raitim, shi hpe Nawku hpung a lam n tsun na hku hkum pat ai lam hpe n hkan shatup ai majaw, sat kau ai hpe hkrum sai. Shi chyawm gaw, Hkristu a lam hkaw tsun nag aw shi a lit madung re, nga nna n hkrit n tsang tsun ai majaw, sat kau hkrum ai lam rai nga ai. Si ai aten du hkra, shi a makam masham hpe n nyet kau ai sha ngang nang rai hkan shatup lai wa ai. Shi gaw, zingri shatsang ai lam matup hkam sha nna A.D (424) ning hta makam masham a majaw sat kau hkrum nu ai.

Dai zawn, makam masham a majaw sat kau hkrum lai wa ai hpang, shi hpe Nawku Hpung gaw, San Pra ai masha dang dat let, Shi a Poi Nhtoi hpe mung, March shata (31) ya shani masat shagrau dat ya sai rai nga ai.

Daini Nawku hpung gaw, San Pra ai Benjamin a Poi Nhtoi hpe galaw nga ga ai aten hta, anhte Hkristan Hpung masha ni marai hkum shagu mung, tinang lu da sai, makam masham hpe kaning re ai aten hta raitim, n nyet kau hkrum hkra, makam masham hta ru jung ngang kang hkra sak hkrum hkawmsa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)