San Pra ai Bartholomew a Poi Nhtoi (August 24) 24 August 2023

San Pra ai Bartholomew a Poi Nhtoi (August 24)

San Pra ai Bartholomew gaw, Madu Yesu hkum nan lata la ai Kasa (12) kaw na malawm langai mi rai nga ai. Shi gaw, Galile ginwang, Kana Mare kaw dai daw ai, Nathanael mying hkawt lu ai wa rai nga ai. Bartholomew ngu ai gaw, Tolmai a kasha ngu ai lachyum rai nna, kahtap shamying ai mying rai nga ai. Shi gaw, ga shaga n lata chye shaga ai wa re.

Philip gaw, “Anthe Nazaret mare na Yesu, Hkye La Madu hpe mu saga ai.” nga nna shi hpe tsun ai shaloi shi gaw: “Narazet zawn re ai kahtawng kaw na kaja ai baw pru na gaw re i?” nga nna tsun ai. Nazaret gaw, arawng lu ai baw hpa mying mung n pru ai kahtawng kaji rai nga ai. Bartholomew tsun ai ga hpe Madu Yesu gaw, ra sharawng ya ai; dai majaw Yesu gaw, shi hpe: “Ndai wa gaw Israel amyu sha majing nan rai nga ai. Shi hta ung-ang ai myit n nga ai” nga ai. (Yawhan 1:47)

Moi shawng de na laika ka sara ni ka da ai hta San Pra ai Kasa Bartholomew gaw, India mungdan hte Sinpraw dan na zai dik ai mungdan hkan tara hkaw shabra ai lam chye lu ai. Tsa ban masum mayan hta India mung de, San Pra ai Pantaenus sa du ai shaloi, Kasa Bartholomew sa tawn kau da ai, nga ai Hebrew ga hte ka tawn ai Mahte a Kabu Gara Shiga Laika hte Hkristu a Hpaji Machye Machyang “Gospel of St. Mathew and Knowledge of Christ” laika yan hpe bai sa mu lu ai lam, shi a labau hta ka matsing da nga ai.

Kasa Bartholomew gaw, Armenia mung de sa du nhtawm, sumla naw ai ni law law hpe makam masham de woi jashawn da ya wu ai; dai mung kaw nan San Pra ai Kasa Bartholomew gaw, makam masham a matu shi a asak hpe ap nawng si hkam lai wa sai rai nga ai.

Matsun maroi hkrat wa ai hta, Kasa Bartholomew hpe chyahkrung wan ntsa ga-kang ai hpang hpyi gawng kau ya nhtawm, shan kaman shakra tawn nna, laja lana zingri ai hpang baw kahtam di kau ya ma ai nga nna, ka tsun hkrat wa ma ai.

Shi n nga mat ai hpang, Nawku Hpung gaw, Shi hpe e, San Pra ai Masha dang dat let, Shi a Poi Nhtoi hpe mung, August shata (24) ya shani ngu masat shagrau dat ya sai rai nga ai.

Daini Nawku hpung gaw, Kasa Bartholomew a Poi hpe galaw nga ai aten hta, anhte hpung masha ni mung, Kasa Bartholomew a kasi hpe yu la nna, tinang lu da sai makam masham hpe kaning re ai ahkying aten hta mi du ai raitim, sakse hkam lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)