San Pra ai Bartholomew a Poi Nhtoi (August 24)

San Pra ai Bartholomew gaw, Madu Yesu hkum nan lata la ai Kasa (12) kaw na malawm rai nga ai. Shi gaw, Galile ginwang Kana Mare kaw dai daw ai, Nathanael mying hkawt lu ai wa rai nga ai. Bartholomwe ngu ai gaw, Tolmai a kasha ngu ai lachyum rai nna, kahtap shamying ai mying rai nga ai. Shi gaw, ga shaga n lata chye shaga ai wa re. Philip gaw, “Anthe Nazaret mare na Yesu, Hkye Hkye La Madu hpe mu saga ai.” Nga nna shi hpe tsun ai shaloi shi gaw: “Narazet zawn re ai kahtawng kaw na kaja ai baw pru na gaw re i?” nga nna tsun ai. Nazaret gaw, arawng lu ai baw hpa mying mung n pru ai kahtawng kaji rai nga ai. Bartholomew tsun ai ga hpe Madu Yesu gaw, ra sharawng yan ai; dai majaw Yesu: “Ndai wa gaw Israel amysha majing nan rai nga ai. Shi hta un gang ai myit n nga ai” nga ai. (Yawhan 1:47)

Moi shawng de na laika ka sara ni ka da ai hta San Pra ai Kasa Bartholomew gaw, India mungdan hte Sinpraw dan na zai di kai mungdan hkan tara hkaw shabra ai lam chye lu ai. Tsa ban masum mayan hta India mung de, San Pra ai Pantaenus sa du ai shaloi, Kasa Bartholomew sa tawn kau da ai, nga ai Hebrew ga hte ka tawn ai Mahte a Kabu Gara Shiga Laika hte Hkristu a Hpaji Machye Machyang “Gospel of St. Mathew and Knowledge of Christ” laika yan hpe bai sa mu lu ai. Kasa Bartholomew gaw, Armenia mung de sa du nhtawm, sumla naw ai ni law law hpe makam masham de woi jashawn da ya wu ai; ndai mung kaw nan San Pra ai Kasa Bartholomew gaw, makam masham a matu shi a asak si hkam kau wu ai.

Matsun maroi hkrat wa ai hta, Kasa Bartholomew hpe chyahkrung wan ntsa ga-kang ai hpang hpyi gawng yak au, shan kaman shakra tawn nna, laja lana zingri ai hpang baw kahtam di kau ya ma ai.

Daini Nawku hpung gaw, Kasa Bartholomew a Poi hpe galaw nga ga ai zawn, anhte hpung masha ni mung, Kasa Bartholomew a kasi hpe yu la nna, tinang lu da ai makam masham hpe kaning re ai ahkying aten mi du tim, sakse hkam lu ai nib yin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)