San Pra ai Arsenius a Poi Nhtoi (July 19) 19 July 2022

San Pra ai Arsenius a Poi Nhtoi (July 19)

San Pra ai Arsenius gaw, A.D 354 ning hta, Roma Mare kaba kaw shangai chyinghkai wa ai rai nga ai. Deacon aya hkam la ai hpang Constantinople mare na Hkawhkam Theodosius (I) a kasha ni hpe hpaji sharin ya lai wa ai. Shi gaw, ja gumhpraw hpe shaning (10) ning tup ra ai hku nna jai lang ai hpang, Constantinople mare kaw na pru mat wa nhtawm Alexandria mare kaw sa nga mat ai.

Zaibru jang hkan na tawra ni hte rau Wadi Natrun, Conopus, Troe hkan sa nga ai hpang, shi a myit jasat ni tsep-kawp galai shai mat wa ai. Shi hkrai tara shadik nna nga ai, yu maya bu hpun palawng bu hpun nhtawm, asak hkrung na daram sha malu masha hpe shadawn sharam sha ai. Aten malawng maga hpe akyu hpyi ai hte jamjau hkam nna shama kau ai. Shi a manaw manang ni a ntsa shawang tsawra myit grai kaba timung, shanhte hte nau n nga ai sha koi let nga chye ai.

San Pra ai Arsenius gaw, matsun maroi ga hte maumwi (44) hpe mung ka kau da ai sha n-ga, shinggyim masha shada sharin la lu ai machye machyang ni mung ka kau da ai. Shi gaw, akyu hpyi shaja jam jau hkam ai, tinang a myit ningdang ai amu galaw nna, Karai Kasang a mungdan du lu na matu masha ni hpe kasi kamang madun ya ai wa mung rai nga ai. Hkristan mungdan a matu akyang lailen hte seng ai shadum matsun ga ni mung ka kau da ai.

San Pra ai Arsenius gaw, A.D (450) ning, shi a asak (96) ning hta Madu kaw yup pyaw bansa mat wa sai rai nga ai.

Shi n nga mat ai hpang, Nawku Hpung kaw nna Shi hpe, San Pra ai Masha dang dat let, Shi a Poi Nhtoi hpe mung, July shata (19) ya shani masat shagrau dat ya sai rai nga ai.

Daini Nawku Hpung gaw, San Pra ai Arsenius a Poi Nhtoi hpe galaw nga ai aten hta, anhte mung, kadun la ai shing gyim prat hta tinang lu da sai manu dan la dik ai machye machyang, mahkrum madup ni hpe tinang a manaw manang ni, dum nta masha ni hpe bai gin len kau da chye ai ni byin tai lu hkra shakut sa wa nga ga law.

By;

Sister Rose Angline Maran Nang Doi (SFX)

RVA-Kachin Service (Myitkyina)