San Pra ai Anthony Zaccaria a Poi Nhtoi (July 5) 05 July 2023

San Pra ai Anthony Zaccaria a Poi Nhtoi (July 5)

San Pra ai Anthony Zaccaria gaw, Clerks Regular of St. Paul mying ai Magam Gun Wuhpung hpe de hpang dat ai San Pra ai wa rai nga ai. Shi gaw, 1502 ning hta Italy Mungdan, Cremona mare kaw shangai chyinghkai wa ai rai nga ai. Shi grai naw kaji ai aten kaw nna Kawa n nga mat nu ai. Kanu gaw, shi hpe wenyi lam hta matsan masha ni a ntsa matsan dum ra ai myit jasat ni hpe atsawm sha sharin ya ai.

Anthony gaw, Padua mare na, Dakkasu kaw tsi hpaji sharin la nna, asak (22) ning hta tsi sarawun amu galaw na matu nta de bai wa ai. Raitimung, shi a myit hta hkum hkrang tsi sara malai wenyi tsi sara tai na matu myit daw dan wu ai. Dai majaw, shi gaw, Karai Kasang hte seng ai Theology hpaji hpe sharin la nna ramma ni hpe tara ga sharin ya ai. 1528 ning hta shi Jau tai wa nna Milan mare de du wa ai. Dai mare kaw shayi sha ni hpe hkye la na matu yaw shada ai amyu shayi wuhpung hpe npawt sharawt hpaw hpang ai hta garum jaw ya ai.

Dai hpang, lahkawng ning na ai shaloi, Kaga Jau lahkawng hte rau Clerks Regular of St. Paul mying ai Magam Gun Wuhpung hpe hpaw hpang dat ma ai. Dai Magam Gun Wuhpung gaw, Nawku Hpung a sharin shaga ai lam hte Sacramentu ni hpe gingdan ai hte hkam la na lit gun na matu yaw shada ai. Shanhte gaw, San Barnabas Nawku Jawng kaw ginjaw shatai ai majaw, shanhte a wuhpung hpe “Barnabites” ni nga nna shamying ma ai. Ndai Wuhpung shang ai ni gaw, Nawku jawng hkan, gat kata hkan tara hkaw ai sha n-ga, machyi masha ni hte matsan masha ni hpe mung yu lajang ya ma ai.

San Pra ai Anthony Zaccaria gaw, n hkring n sa kasa amu gun ai majaw, asak (37) ning sha naw rai yang, 1539 ning, July shata (5) ya shani hta Madu kaw yup pyaw ban sa mat wa sai rai nga ai.

San Pra ai Anthony Zaccaria n nga mat ai hpang, 1890 ning, January shata praw (3) ya shani dai aten na Wa Sarabyin Leo (13) kawn, Shi hpe A Lu ai Masha masat shagrau dat ya sai rai nga ai.

Dai hpang, 1897 ning, May shata (27) ya shani hta gaw, Wa Sarabyin Leo (13) sha, Shi hpe San Pra ai Masha dang dat nna, Shi a Poi Nhtoi hpe mung, July shata (5) ya shani masat shagrau dat ya sai rai nga ai.

Daini Nawku Hpung gaw, San Pra ai Anthony Zaccaria a Poi Nhtoi hpe galaw nga ai aten hta, anhte Hpung Masha ni mung, tinang a Prat  hta e, Karai Kasang a Shaga la ai nsen hpe na dat ai hte rau, Shi a Magam Gun hpai lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)