San Pra ai Ansegisus a Poi Nhtoi (July 20) 20 July 2023

online image

San Pra ai Ansegisus a Poi Nhtoi (July 20)

San Pra ai Ansegisus gaw, Fransik mungdan kaw, lai wa sai A.D (770) ning hta shangai chyinghkai wa ai. Shi a Asak (18) ning du ai shaloi, Fontanelle Tawra Jawng kaw laika hpaji sharin hkaja nga yang, shi a grai ning tawn ai atsam hpe mu lu ma ai. Charlemagne hkawhkam e shi hpe lit jaw da ai Rheims Mare na San Pra ai Sixtus hte Chalens Mare makau na San Pra ai Menge Tawra Jau Jawng ni hpe gram galai ya lai wa sai. Dai hpang shi gaw, Flay mare na, San Pra ai Germer Tawra Jau jawng kaw na Jau kaba lit hpe shatsam ya ai hkrum sai. Shi gaw, Hkawhkam a hpaji jaw lit hkam amu gun nga ai ten hta mung, mung masa hte seng ai dat kasa amu law law gun hpai lai wa sai rai nga ai.

Hkawhkam kaba Louis hte Debonair up hkang ai ten hta shi gaw Luxeuil mare na ni hpe manga ning tup grai ayak ahkak rai lu gram ya ai hpang, Fontanelle jawng de bai du wa ai. Shi bai du ai A.D (823) ning a hpang jawng dai grai rawt jat mat wa sai. Fransik Hkawhkam ni jawm madi shadaw ya nna shawa masha ni kaw du mat wa ai rit kawp tara laika gaw, San Pra ai Ansegisus shakut ka lajang da ai hkan sa tara laika buk rai nga ai.

Shi lit gun nga ai aten hta mying kaja wa ai jawng manga mung shi gram shading sharai ya ai majaw rai nga ai. Shi a atsam dat ai myit, san seng san pra ai sat lawa ni hpe mu nna, masha law law Karai Kasang hpang de gale shang wa ma ai.

San Pra ai Ansegisus gaw, A.D (833) ning, July shata (20) ya shani hta Madu kaw yup pyaw ban sa mat wa sai rai nga ai.

Shi n nga mat ai hpang, Nawku Hpung gaw, Shi hpe e San Pra ai masha dang dat let, Shi a Poi Nhtoi hpe mung, July (20) ya shani masat shagrau dat ya sai rai nga ai.

Daini Nawku Hpung gaw, San Pra ai Ansegisus a Poi Nhtoi hpe galaw nga ai aten hta, anhte mung, kadun la ai shingyim sak prat hta dum nta masha ni a matu, nawku hpung hte mungdan a matu, akyu rawng manu dan ai magam bungli ni hpe galaw kau da lu ai ni byin tai lu hkra shakut sa wa nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

 

Add new comment

13 + 0 =