San Pra Ai Angela Merici A Labau Lam (28 January, 2020)

San Pra Ai Angela Merici A Labau Lam

          Nu wa hpu nau ni, San Pra ai Angela Merici gaw, Italy Mungdan Garda ngu ai hka nawng makau na, Desenzare amying shingteng ai mare kaw Madu a shaning (1474) ning hta shangai dai daw wa sai rai nga ai. San Pra ai Angela Merici ngu jang, nkau gaw, Merici nga ai hpe malawng maga nshaga ai re majaw, Angela Merici nga ai gaw, kaga san pra ai masha mi rai kun? Nga ngu ang na zawn zawn rai na re. Kaja nga jang, San Pra ai Angela hte Angela Merici gaw, langai sha rai nga ai. San Pra ai Angela Merici gaw Madu Karai Kasang hpe grai tsawra ai shayi sha re majaw, shi a sak prat hpe si ai ten du hkra, san seng san pra ai ( hkawnsek ) prat hte ap nawng lai wa sai lam Nawku hpung a labau hta adan sha mu lu nga mali ai re. Angela Merici gaw, San Pra ai Ursula Mama Hpung Magam gun Hpung ( Company of Ursula ) hpe de hpang da ai sanpra ai wa mung rai nga ai. Angela Merica gaw, asak grai naw kaji ai ten kaw nna, kanu yen kawa si shakram kau da ai hpe hkrum nga nu ai. Shingrai, kaji ten kawn chyahkrai kasha tai let, sak hkrung nga ra sai. Shi a asak (13) ning hta, shi a kana langai mi, hpang jahtum na Sakramentu hpe n hkam la lu ai sha si mat wa ai hpe shingran mu nna, Angela gaw, Franciscan Mama tai jawng de sa nna, Mama tai na matu, myit hkrut kau nu ai. Shingrai, Angela Mama tai jawng de sa nna, seng ang ai machye machyang hpaji hte makam masham hpaji lam ni hpe sharin hka ja la nhtawm me, Mama tai wa sai rai nga ai.

          Ya na zawn, Mama prat hte ap nawng daw jau nga ai ten, myit shingran langai mi mu lu nu ai. Dai gaw hpa rai ta nga jang, “lani mi na nhtoi hta shi gaw, wenyi ni hpe hkye la na ramma hpung hpe de hpang na rai nga ai,” ngu ai shingran rai nga ai. Shingrai, Angela Merici gaw, shi a shingran hpe ta tut galaw sa wa na matu, Madu Karai Kasang kaw akyu hpyi shaja nga nu ai. Shi a shingran hpe myit kraw kata hta bang da let, shakut hpang wa sai. Angela Merici gaw, num sha ma ni hpe lam woi madun na matu, Dsenzare mare kaw langai, Brescia mare kaw langai, ramma ni a  matu, laika sharin jawng hpe hpaw ya sai lam labau shang rai nga sai. Bai nna,  Angela a manang amyu shayi sha ni marai (12) mung, ga sadi tawn nna, matsan mayen re ai ma ni hpe laika hpaji sharin ya ai lam chye lu ai. Dai shayi num sha (12) gaw, ga sadi tawn ai raitim, Angela zawn rai Mama bu hpun mawn sumli ai lam n nga ai sha, shanhte galoi mung bu hpun ai hpun palawng ni hpe hpun nna, dai jawng de sa sharin ya ya di ma ai da.

          Dai amyu shayi sha (12) gaw, laika hpaji ni sha n ga, tara laika ni, akyu hpyi ga ni hpe  sharin ya ai, kaga machye machyang lam ni law law sharin ya nna, shakut shaja woi awn nga sai. San Pra ai Angela Merici gaw, ya na zawn, shi a mama hpung hpe nnan hpaw hpang la lu sai rai nga ai. Shanhte ni rau jawm nga ai shara mung, grai hkyik hkam ai nta, shara nrai nga ai. Raitim, dai shara hta,( charity ) ngu ai,  hpu nau tsawra myit jasat hte, (family spirit) ngu ai, wuhpung kata tsawra rap ra myit ni hpe grau tang du hkra, sharin ya lu na matu, ma ni hpe shanhte a dum nta hkan de du hkra, sa du nna sharin ya ma ai lam labau hta ka matsing da ai hpe mu lu nga mali ai nu wa ni. Shingrai, Madu a shaning ( 1525 ) ning du ai shaloi, San Pra ai Angela wuhpung ni gaw,  magam gun Mama hpung hpe tara shang hkrang hte grak rai nna, de hpang sai lam labau shang rai nga sai. Ndai San Pra ai Angela Merici gaw de ai Mama wuhpung hpe San Pra ai Ursula makawp maga bau sin na matu, yaw shada nhtawm me, San Pra ai Ursula Mama hpung ngu nna, shamying la masai. Nawku Hpung kawn nna, San Pra ai Ursula hpe mungkan ting hta nga ai Dakkasu Jawng ni kam shamyet ai sanpra ai masha mung rai nga ai. Shingrai, Ursula Mama hpung ni woi awn ai laika sharin jawng ni gaw, Italy mungdan na Kahtawlik Nawku Hpung a matu, galu kaba lam shabyin ya ai re, nga nna, labau hta angang akang hpaw tsun da nga mali ai re.

          Shingrai nu wa hpu nau ni San Pra ai Angela Merici gaw, matsan mayen re ai Num sha ma law law, Madu Yesu hte Nu Maria hpe chye wa nna, makam masham hta ru jung nga mu ga matu shakut ya nga sai. Mara lu ai ni, num sha ma ni, myit malai lu nna, kaja ai masha ni tai wa lu na matu, sharin shaga lam woi awn madun ya nga ai. Bai agung alau hta na lawt lu n htawm me, sak hkrung sa lu na matu, nga shara nta galaw nna, san seng ai hte hpaji chye ai num sha ni hpe tam nna, sharin shangun ai. Shingrai, Ursula Mama wuhpung gaw, lani hte lani grau grau nna, rawt jat galu kaba ai hte hpaji chye ai ni mung law law rai wa sai. Nu wa ni, San Pra ai Angela Merici gaw, sumnung shingdi ai, sari rawng ai num sha ma rai nga ai. Shi a Mama wuhpung hta mama tai ai ni mung law law rai nga ai. Ya daini na ten, ndai Ursula Mama hpung hta mama ni hkying, mun nga wa sai rai nga ai. San Pra ai Angela Merici gaw, san seng san pra ai Mama prat hta ap nawng magam gun nga let, Madu a shaning (1540) ning hta Madu woi la hkrum sai rai nga ai. Nawku hpung kawn nna, shi a poi nhtoi shani hpe January Shata (27) ya shani ngu masat da ya sai. Shingrai, nu wa ni, san pra ai Angela Merici a kasi hpe la let, matsan mayen re ai ma ni hpe lakawn la ga, grau nna, machye machyang hpaji lam hta hpang hkrat nga ai ni hpe lam woi awn sharin ya ga, lam madun la ga, matsan jam jau nga ai jahkrai ma ni hpe pawn ba la ga ngu, n gun jaw let lamang hpe ndai kaw naw jahkring sai rai.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.