San Pra ai Andrew Kim Taegon, Paul hte Manang ni a Poi Nhtoi 20 September 2022

online omage

San Pra ai Andrew Kim Taegon, Paul hte Manang ni a Poi Nhtoi (September 20)

 

Jau Andrew Kim Taegon, Paul Chong Hasang hte Hpung Masha ni marai (78) gaw, 1839 hte 1846 ning lapran hta makam masham a majaw, sat kau hkrum lai wa masai rai nga ai. “Korea Mungdan na Makam Masham a majaw sat kau hkrum ai ni” nga nna shamying hkrum ai ni gaw, baw kahtam daw kau ai, du manat sat kau ai, shing n rai hpan shagu hte zingri sat shamyit kau hkrum ai ni rai nga ai. Ndai San Pra ai masha ni gaw, Korea Mungdan de Nawku Hpung  du ai hpang, Kahtawlik Makam Masham a majaw, sat shamyit kau hkrum ai masha hkying mun kaw na kaji kajaw mi sha rai nga ma ai.

Jau Andrew Kim Taegon gaw, 1821 ning, August shata (21) ya shani, Seoul Mare Kaba hta shangai chyinghkai wa sai rai nga ai. Shi gaw, Korean amyu ni kaw na shawng ningnan Jau tai wa sai wa mung rai nga ai. 1845 ning hta Miwa Mungdan, Shanghai mare kaw Jau shatai Sakramentu hpe hkam la lai wa sai. Dai hpang, dai daw buga Korea Mungdan de lagyim wa nna, maigan mungdan ni kaw na sasana magam gun ni Korea mungdan de shang wa na matu, masing wa jahkrat nga yang lamu ga jarit sin wunhpung ni e rim la kau ai hpe hkrum sai.

1821 ning, August shata (21) ya shani gaw, Jau Andrew a Baw hpe Seoul Mare Kaba makau na, Han hka kau kaw e kahtam di bang kau ma ai. Jau a moi mang hpe shawa masha ni a matu, masum ya madun da ma ai.

Bai San Pra ai Paul Chong Hasang hpe gaw, 1795 ning shangai chyinghkai wa ai rai nna, Korea Mungdan Nawku Hpung a ru jung ngang kang lu na matu grai shakut lai wa sai wa mung rai nga ai.

1984 ning, May shata (6) ya shani, dai aten, Korea Mungdan kaw du nga ai San Pra ai Wa Sarabyin Yawhan Pawlu (II) kawn, Jau Andrew Kim Taegon hte, Paul Chong Hasang sha n-ga, yawng rai yang marai (98) hpe e San Pra ai masha hku nna dang dat let, Shanhte a Poi Nhtoi hpe Mung September shata (20) ya shani ngu masat shagrau dat ya sai rai nga ai.

Dai hta n-ga, San Pra ai Jau Andrew Kim hpe “Korea Jau ni hpe Lak san makawp maga ai san pra ai masha” (Patron of the Korean Clergy) nga nna masat shagrau ya sai rai nga ai.

Daini Nawku Hpung gaw, San Pra ai Andrew Kim Taegon, Paul hte Manang ni a Poi Nhtoi hpe galaw nga ga ai aten hta, anhte mung, dinghta ga a ru yak jam jau, zingri zingrat lam ni kade hkrum wa ai raitim, tinang lu da sai Makam Masham hpe n nyet kau ai sha, matut hkawsa nga ga law.

 

 

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

9 + 6 =