San Pra ai Alphonsus Liguori a Poi Nhtoi (August 1) 01 August 2022

San Pra ai Alphonsus Liguori a Poi Nhtoi (August 1)

San Pra ai Alphonsus Liguori gaw, “Redemptorists” Magam Gun Wuhpung hpe gaw de hpang ai San Pra ai Masha rai nga ai. Shi gaw, 1696 ning, September shata (27) ya shani, Italy Mungdan, Naples mare kaw shangai chyinghkai wa ai rai nga ai.

Shi gaw, grai mying kaja htum laika sharin jawng kaw hpaji sharin la lai wa ai. Shi a asak (16) ning hta shing gyim hkan sa tara hte seng ai Hpaji Ning Hkring “Doctorate in Law” Janmaw hpe gup la lu nu ai.

1723 ning hta shi shang lawm je yang ya ai mang hkang n awng dang ai majaw, yak hkak hkrum nu ai. Shi a kraw kata kaw, “Mungkan myit jasat hpe tawn kau nna, na a hkum Ngai hpe jaw rit,” “Leave the world and give yourself to me.” Nga ai nsen na lu wu ai.

San Pra ai Alphonsus gaw, 1726 ning, December shata (21) ya shani hta, Jau tai wa sai. Shi tara hkaw ai shaloi grai sang lang dik ai majaw, mying grai kaba wa nu ai. “Masha hpawng kaw na matsan dik ai gumgai jan n chye madat na tara ngai n hkaw ga n ngai.” nga nna shit sun ga ai. Shi gaw, Jansenism ngu ai ladu shalai, hkan shatup n lu ai akyang lai len ni hpe n gun jaw ai, lachyum n pru ai sharin shaga lam hpe aja awa ning hkap wu ai. Shi gaw, “Myit malai nlu ai ni hpe, zingri shatsang na mara lu ai ni zawn n re ai sha, hkye la ra ai wenyi ni hpe zawn hkap la ra ga ai.” nga nna ayan tsun shadum ai. Shi kaw mara sa raw ai ni kadai hpe mung mara n raw ya ai n nga ga ai, nga nna tsun shajang ma ai.

San Pra ai Alphonsus gaw, 1732 ning hta, Chyoi Pra Dik ai Hkye Madu Wuhpung” ngu ai, “Congregation of the Most Holy Redeemer” hpe de da ya sai rai nga ai. Ndai Magam Gun Wuhpung gaw, mare kata hte kahtawng hkan chye na loi ai tara hkaw ladat hte hkaw shabra ma ai. San Pra ai Alphonsus gaw, “Lai kyang hte seng ai hpaji ning hkring” Moral Theologian rai nga ai. 1748 ning hta, shi ka shalat da ai, “Moral Theology” laika buk hpe Wa Sarabyin hkum nan madi shadaw shagrin ya sai rai nga ai.

1756 ning hta San Agatha Nawku Jawng kaw Saradaw tai wa ai hpang, shi hte seng ai shara shagu de du nhtawm, Hpung Masha ni hte Jau ni a shading sharai ra ai lam ni hpe matut ding yang galaw ai. Saradaw Alphonsus gaw, Misa Hkungga hpe manit (15) Laman tin shapun rai nna nawng jau ai Jau ni hpe, Misa Hkungga nawng jau na ahkang pat jahkring ya kau ai. Shi a leng (Carriage) hte Saradaw Lata-chyawp (Episcopal Ring) hpe dut kau nna, matsan masha ni hpe garum madi shadaw ai amu galaw lai wa ai. Shi a asak jahtum daw de machyi kaba hkrum ai. Grau ai gaw, shi de hpang da ai Sasana Magam Gun Wuhpung shang jau ni nan, shi hpe jam jau jaw shatsang ai, dingbai dingna jaw ai hte dai Wuhpung kaw nna shapraw kau ai hpe hkrum nu ai. Shi hkrum ai jam jau jam hkau lam ni hpe shi a wenyi hpe jasan jaseng ya ai re, ngu hkap la lai wa ai.

San Pra ai Alphonsus gaw, 1787 ning, August shata praw (1) ya shani hta Madu kaw yup pyaw ban sa mat wa sai rai nga ai.

Shi n nga mat ai hpang, 1816 ning, September shata (15) ya shani hta dai aten na, Wa Sarabyin Pius (7) kawn, Shi hpe A Lu ai Masha masat shagrau dat ya sai rai nga ai.

Dai hpang, 1839 ning, May shata (16) ya shani hta, dai aten na, Wa Sarabyin Gregory (16) kawn, Shi hpe San Pra ai Masha dang dat let, Shi a Poi Nhtoi hpe mung, August shata praw (1) ya shani ngu masat shagrau dat ya sai rai nga ai.

Dai ni Nawku Hpung gaw, San Pra ai Alphonsus Liguori a Poi Nhtoi hpe galaw nga ga ai aten hta, anhte sak prat hta mung, kalang lang Wa Saradaw Alphonsus zawn rai nna, yak hkak jam jau lam ni, tinang kam gying masha ni a shing du tawn da hkrum ai lam ni hpe byin hkrum wa na ga ai, raitimung, myit nhtum ai sha, tinang asak prat htum ten du hkra, Karai Kasang Shi ra sharawng ai, galaw shangun mayu ai magam bungli hpe ngut kre hkra galaw lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)