San Pra ai Albert a Poi Nhtoi (November 15) 15 November 2023

San Pra ai Albert a Poi Nhtoi (November 15)

San Pra ai Albert gaw, Germany Mungdan, Swabia shara kaw na rai nga ai. “Order of Preachers Dominican” ngu shamying da ai “Hkaw Shabra Dominican Sasana Magam Gun Wuhpung” kaw na malawm langai mi rai nga ai. Bai nna shi gaw, San Pra ai Thomas Aquinas hpe laika hpaji sharin achyin ya ai sara mung rai nga ai. Shi a prat tup hta laika ka ai amu hte sharin achyin ya ai amu hte sak hkrung ngai lai wa sai.

San Pra ai Albert hpe “Hpungtang Hpaji Ninghkring ni Kam Shamyet ai Wa” (Patron Saint of Scientists) nga nna masat shagrau ai rai nga ai. Bai nna, Shi hpe (Albert the Great and Doctor of the Church) Nawku Hpung a Munu Kaba hku nna shakawn shagrau masat da nga ai. Shi gaw, machye machyang hpaji lam hta sung sung rai, grai ning tawn ai hku nna chye ai San Pra ai Masha mung rai nga ai. Hpungtang hpaji ni hpe grau chye lu hkra sharin hkaja la ai majaw, Karai Kasang hpe mung grau chye, grau tsawra lu ai myit jasat hpe shi lu la wu ai.

San Pra ai Albert gaw, Mungkan ga a shinggyim hpaji hparat hte Karai Kasang hpe kam sham kam hpa ai myit jasat ni hpe kapyawn la nna manu shadan chye ai hpaji ning hkring mung rai nga ai. Shi gaw, “Ja Chyum Laika gaw, masha langai mi a wenyi sak hkrung lam hte seng ai kri madung npawt daju, hpaji machye machyang majing re.” nga nna hkap la ai masha rai nga ai.

San Pra ai Albert gaw, 1280 ning, November shata (15) ya shani, Poland Mungdan hta e, Madu kaw yup pyaw ban sa wa sai rai nga ai.

Shi n nga mat ai hpang, 1622 ning hta, dai aten na Wa Sarabyin Gregory (15) kawn, Shi hpe A Lu ai Masha hku nna masat shagrau dat ya sai rai nga ai.

Dai hpang, 1931 ning, December shata (16) ya shani hta, dai aten na Wa Sarabyin Pius (11) kawn, Shi hpe San Pra ai Masha dang dat let, Shi a Poi Nhtoi hpe mung, November shata (15) ya shani ngu masat shagrau dat ya sai rai nga ai.

Daini Nawku Hpung gaw, San Pra ai Albert a Poi Nhtoi hpe galaw nga ga ai aten hta, anhte Prat hta mung, San Pra ai Albert zawn, tinang chye da ra ai dinghta hpaji machyi machyang hte chyum hpaji ni hpe dang lu ai made hkaja la nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

 

Add new comment

5 + 9 =