San Pra ai Agnes a Poi Nhtoi (January 21)

San Pra ai Agnes gaw hkum gawng shing yan grai san tsawm ai Roma amyu shayi sha rai nga ai. Shi gaw, shi a kum hpe Karai Kasang a matu ap kau nhtawm dinghku de ai lam hpe ninghkap kau ai mahkawn kasha rai nga ai. Shi a Mying Agnes ngu ai ga a lachyum gaw, “Sagu Kasha” ngu ai rai nga ai.

Shi hpe sa ni htep shaga mayu ai shabrang ma ni hpe “Nye a hkum hpe yu maya mi hte n mu lu ai, sumsing mungdan kaw na shabrang kasha hpe ap kau sai re.” ngu nna asan sha bai mahtai jaw jaw rai wu ai. Dinghku de ai lam hte seng nna shi myit n hkut ai re lam chye ai majaw, shabrang ma ni gaw shi hpe Hkristan Hpung masha re, ngu nna mara tam ma ai. Makam masham hpe madung tawn nna shi hpe mara amyu myu tam lai wa ma ai.

A.D 305 ning, Agnes a sak (12) ning du ai shaloi, shi hpe tara rung de mara shagun nna san jep jeyang ma ai. Tara agyi ni a shakawn masu ai ga, jahkrit shama ai ga ni gaw, shi a myit hpe n galai shai ya lu ma ai; shi a makam masham myit gaw nan nan sha rai nga nu ai. Dai majaw, Agnes hpe nse nsa galaw ai gawk kata de rawng bang kau ma ai. Dai gawk kaw shi hpang de nse nsa myit hte ni kahtep sa wa ai la shagu gaw shi a man kaw du ai hte rau myit tsep kawp n mau mat mat rai mat shajang ma ai.

Dai majaw, dai hpang kaden nna yang, shanhte gaw Agnes a baw hpe kahtam di kau ya ma ai. Shi a hkum tsawp hpe gaw, Nomentara ngu ai lam makau kaw e makoi mayang da ma ai. San Pra ai Agnes Hkawnsek hpe myit dum masat shagrau ai hku nna, A.D 350 ning hta shi a lup maku kaw e, Nawku jawng langai mi gap da ya sai rai nga ai.

San Pra ai Agnes gaw, shi hpe kahtam sat kau maw ai shaloi, dai n hkru ai masha ni hpe, “Nanhte a nhtu ningwa ni hta nye a sai hte chya amya la lu timung, Karai Kasang kaw ap tawn ai nye a hkum hkrang hpe gaw nanhte galoi mung, awu asin n di lu na rai manit dai.” Ngu nna n hkrit n tsang tsun shadum da ai lam labau hta mu lu nga ai.

San Pra ai Agnes n nga mat ai hpang, Nawku Hpung gaw, shi hpe e San Pra ai masha dang dat let, Shi a Poi Nhtoi hpe mung, January shata (21) ya shani galaw ya ding yang rai nga ai.

San Pra ai Agnes a Poi Nhtoi rai nga ai, January shata (21) ya shani du shagu, Roma mare kaw shi a mying hte gaw gap da ai Nawku Jawng kata kaw sagu lahkawng hpe shaman ai lamang galaw nga ding yang rai nga ai. Dai sagu yan a mun rep la nhtawm Pallia ngu shamying ai Sagu Mun Hkri la nna, San Pra ai Pawlu hte Petru a Poi Nhtoi rai nga ai June shata (29) ya a shawng shani, June shata (28) ya shani dai San Pra ai yan a mying hte gap tawn ai Roma mare na Nawku Htingnu ntsa e shaman nna mara tawn ai lamang galaw nga ai re. Ndai Pallia (Hkri tawn ai sagu mun) hpe Nawku Hpung a Saradaw Kaba Archbishop ni hpe shaman let jaw shagrau ya nga ai re. Shanhte gaw, Kasa Petru a hkang galai ni rai nga ai hpe madun ya ai shagrau masat ding sat mung rai nga ai.

Daini Nawku Hpung gaw, San Pra ai Agnes a Poi Nhtoi hpe galaw nga ai shani hta e, anhte mung jaw teng ai lam hta n hkrit n tsang tsap lu na matu, tinang lu da ai makam masham hpe galoi mi raitim, n nyet kau hkrum na matu ra nga ai chyeju ni hpe lak san hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)