San Luka a Poi Nhtoi (October 18) 18 October 2023

San Luka a Poi Nhtoi (October 18)

San Luka gaw, Tsi Sara ni hte Sumla Ka (soi) ai ni a kam shamyet ai San Pra ai Masha rai nga ai. Shi gaw, Antioch mare kaw na tsi sara kaba rai nga ai. Bai nna, shi gaw, asak hkrung ai baw sumhpa a hkrang sumla mung grai chye (soi) ai wa re ai lam maumwi mausa ka sara ni hkai krat wa ma ai. Chyoi Pra ai Nu Maria a Sumla hpe shawng ka shapraw ai mung, San Luka hkum nan rai nga ai. Shi a hkrang sumla ka ai hpaji ladat hpe sumla ka ai masha ni gaw, tsa ban law law hkan hkaja sagawn sharin la ma ai.

San Luka gaw, Hkristian Makam Masham hpe shawng hkap la ai ni kaw malawm langai mi rai nga ai. Shi gaw, Kasa Pawlu a Hpung Gawan ai hkrun lam lahkawng masum hta hkan nang lawm ai. Shi gaw, Kasa Pawlu a myit rum manang hte garum kahtau jaw ya ai wa mung rai nga ai. Roma Hkawhkam Julius Caesar a lakhtak hta Kasa Pawlu hpe Roma mare de rim mat wa ai shaloi mung, shi hkam nan hkan nang ai. Ndai lam hte seng nna, Roma htawng kata kaw na Kasa Pawlu shagun ai laika hta: “Ya ngai hte arau Luka mung lawm nga ai.” (2 Timoti 4:11) nga nna ka tawn da nga ai.

Kasa Pawlu gaw, A.D (64) ning hta sat kau hkrum lai wa sai. Dai majaw, San Luka gaw, Greek Mungdan kaw wa nga mat ai. Dai aten hta Kabu Gara Shiga hte Kasa Laika hpe San Luka ka da ai rai nga ai.

San Luka gaw, hpaji grai ning tawn ai wa rai nga ai majaw, shi a laika ni gaw, ka hkrang mung jaw nna, chye na la na mung grai loi la nga ai. Kabu Gara Shiga ka ai mali kaw na, San Luka hkrai sha Nu Maria hpe Lamu Kasa ga sa shana ai lam hte Nu Maria gaw, kana San Pra ai Elizabeth hpe sa du gawan ai lam hte seng nna, hkum hkum tsup tsup ka shalawm da nga ai re. Shi hpe Greek hte Latin labau ka ai sara ni the shadawn lu nga ai.

San Luka gaw, shi a asak (48) ning hta, Madu kaw yup pyaw ban sa wa sai rai nga ai. Shi a nrut nra ni hpe ya ten na, Turkey Mungdan a mare daju, Istanbul ngu ai moi na Constantinople mare na Kasa ni a Nawku Htingnu (Church of the Apostles) kaw hkungga la ra rai nna, makoi mayang tawn da nga ai.

San Luka a Poi hpe Nawku Hpung kawn shaning shagu October shata (18) ya shani shakawn shagrau nga ga ai re. Bai nna, dai shani hta gaw, anhte a Buga hta Karai Magam gun hpai nga ai, Tara Hkaw Sara/num ni hpe lak san shakawn shagrau ai poi hpe mung galaw nga ga ai re.

Dai majaw, anhte hpung masha ni mung, San Luka a kasi hpe la let, tinang a prat hta Karai Kasang Wa a magam bungli shatsam hkrum wa ai aten ni hta ning hkap ai lam n nga ai sha, ding yang shakut hkawmsa na ra nga ai zawn, Karai Magam gun nga ai, Tarahkaw Sara/num ni hpe dang dep ai daram garum pawn ba la let, akyu hpyi garum ya na mung ahkyak nga mali ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)