Saint Lucy Filippini (March 25) 25 March 2023

Saint Lucy Filippini (March 25)

San Pra ai Lucy gaw, lai wa sai 1672 ning, January shata (16) ya shani hta, Italy Mungdan, Tascany mare kaw shangai chyinghkai wa ai rai nga ai. Shi shangai ai hpang kade n na yang, Kanu yan Kawa n nga mat ai majaw, shangai ai ten kaw nna chyahkrai ma prat hte nga kaba wa ai. Ma kaji ten kaw nna, shi gaw makam masham grai rawng ai majaw, nga sat nga sa, sat lawat mung si mani ai. Dai majaw, Sarabyin a malai, Saradaw Kaba “Cardinal Marcantonio Barbarigo” gaw, Lucy hpe shaga la ai. Saradaw kaba gaw, Lucy hpe Montefiasconi mare kaw na jawng sarama ni hpe sharin shapan ya na matu lit shatsam ya wu ai. Lucy gaw, Viterbo mare kaw na Sara tai jawng hpe hpang da ai San Pra ai Rose Venerini hte rau magam bungli galaw lai wa sai.

Lucy gaw, atsam hpan magup rawng ai hkawnsek mung rai nga ai. Shi a prat tup laika hpaji hte seng ai amu galaw nna sak hkrung lai wa ai. Laika sharin jawng ni law law hpe mung sharawng shara rai nna hpaw da ai. Wa Sarabyin Clement (IX) gaw, Roma mare kaw mung laika sharin jawng langai hpaw ya na matu Lucy hpe matsun ai. Lucy a makam masham myit ja ai, sari shingkang rawng ai sat lawat hte gam garan jaw ya mayu ai myit ni gaw, Sasana magam hkaw shabra lam hte Hkristan sharin shaga lam ni a matu sakse tai nna manu grai dan lai wa sai.

San Pra ai Lucy gaw, Hkristan ma ni kade law yang law, mai byin ai ni yawng hpe Hkristan a nhtoi shingkang hpe lu la shangun mayu wu ai. Dai lam hte seng nna n hkring n sa atsam dat shakut sharang myit hte gun hpai lai wa ai. Ndai myit jasat ni a majaw, masha law law shi hpe kam shamyet wa let garum jaw ai sha n-ga, shi a magam bungli hta shang lawm gun hpai wa ma ai.

San Pra ai Lucy gaw, 1726 ning hta e, n ji n mu machyi makaw hkrum wu ai, dai shaloi na machyi makaw lam gaw, shawoi na zawn n mai wa ai hte 1732 ning, March shata (25) ya shani hta gaw, shi tau nau tsun da ai nhtoi shani nan Madu kawn yup pyaw ban sa mat wa sai rai nga ai.

San Pra ai Lucy gaw, atsam marai law law rawng ai shayi sha ni hpe, shanhte lu ai shaman chyeju atsam hte masha law law hpe Hkristu Madu kaw woi du lu hkra asung jashawn na matu, myit shadum ya nna kasi kaja madun lai wa sai rai nga ai.

Shi n nga mat ai hpang, 1926 ning, June shata (13) ya shani hta gaw, dai aten na, Wa Sarabyin Pius (XI) kawn, shi hpe a lu ai masha ngu masat shagrau dat sai rai nga ai.

Dai hpang 1930 ning, June shata (22) ya shani hta, Wa Sarabyin Pisu (XI) kawn nna sha, shi hpe San Pra ai masha dang dat let, shi a Poi Nhtoi hpe mung, March shata (25) ya shani masat shagrau dat ya sai rai nga ai.

Daini Nawku hpung gaw, San Pra ai Lucy Filippini a Poi Nhtoi hpe galaw nga ai aten hta, anhte mung, tinang chye da ai machye machyang ni hpe, tinang a hpang de nga pra na ni rai nga ai, Ma ni hpe bai gam garan kachyan da ya lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)