Rosary A Nu Maria Poi (October 7)

“Our Lady of the Rosary” Rosary A Kanu poi nhtoi hpe Wa Sarabyin Pius V, 1571, Turkish ni Lepanto majan hta hkrat sum nna hprawng mat wa ra ai nhtoi, October shawng na laban hpe la nna masat dai ai rai nga ai. Dai nhtoi gaw Mediterranean na Muslim ni a jahkrit shama ai kaw nna lawt lu ai nhtoi re ngu mung tsun ma ai. Roma kaw dai shani hpe sha-ang nna, shaning shagu masha hpawng lam hkawm let Rosary hti ai lam galaw ma ai. Hpang daw de gaw dai rosary hti ai nhtoi hpe October 7 ya shani hpe masat shagrin da ma ai.

Dominican ginru ginsa labau hte maren, 1206 shaning, San Dominic France mungdan Prouille kaw nga ai ten Albigensians masha ni hpe Catholic makam masham hpe hkap la kam sham wa na matu shakut lai wa yu ai.

Asak naw kaji ai Jau Dominic gaw makam masham hpe ninghkap rawt malan ai ni shi a sasana galaw ai hpe hkap la wa mu ga matu Rasary hti na matu Rosary jaw ai Nu Maria hpe shingran mu ai ten du hkra, awng dang ai lam kaji kajaw sha naw lu ai. Dai shi hpe jaw da ai Rosary hti hpang ai kaw nna gaw tsa ban 15 aten hta jau hte sara kaba tai wa ai Alanus de Rupe hte rau shi a hpang hkan ai ni law law nga wa ma ai.

1571 shaning hta Wa Sarabyin Pius V gaw Cyprus na Hkristan ni, grau nna famagusta kaw nga ai Venetian masha ni hpe hpyen (Muslim) ni a lata kaw nna hkye la na matu dap ni hpaw nna da na matu Hkristan ni hpe zinglum da ai.

1571, October 7 ya shani, “Holy league” mying ai dingda Europe mungdaw na Kahtawlik ni Messina hte Sicily kaw nna sanghpaw li ni hte rawt sa nna Lepanto kaw na n gun kaba dik ai Ottoman hpyen hpung hte hkrum gasat ma ai.

Raitim, Hkristan wuhpung ni hta laknak arung arai n law ai hpe chye ai Wa Sarabyin Pius V gaw hpyen ni a npu kaw nga taw ai Hkristan ni hpe hkye la ai hta awng dan lu na matu Europe kaw nga ai nawku hpung masha ni hpe Roma de lam hkam Rosary hti na matu saw shaga ai.

Kaja wa sha nan mung hpang jahtum hta n gun grai ja ai Ottoman hpyen hpung ni hpe gasat da la lu ma ai.

Ndai awng dang ai nhtoi hpe la nna, Wa Sarabyin Pius V gaw “Our Lady of Victory” “Awng dan lam jaw ai hkawhkam jan poi” nhtoi hpe shaning shagu galaw na matu masat shagrin da ai.

1573 shaning hta Wa Sarabyin Gregory XIII gaw “Feast of Our Lady of Victory” mying hpe “Feast of the Holy Rosary” “Chyoi Pra ai Rosary a Hkawhkam Jan” ngu bai shamying lai da ai.

1671 shaning hta Clement X gaw Spain mungdan ting hta dai poi hpe galaw na matu n gun jaw lai wa ai. Bai, shi a hpang na Clement XI mung Hkawhkam Eugene woi awn ai hpyen ni Turks hpyen hpung ni hpe 1716, August 5 shani Petrovaradin majan hta gasat dang la ai masat dingsat poi hpe “Our Lady of the Snows” mying hte mungkan ting hta Rosary hti let poi galaw na matu matsun lai wa ai.

Leo XIII gaw Kanu Nu Maria hte seng ai “Loreto Litany” hta “Queen of the Most Holy Rosary” “Rosary a Hkawhkam Jan e” ngu ai akyu hpyi ga hpe bang da ai.

1913 shaning hta Pius X gaw October 7 ya hta galaw ai  dai poi hpe nawku daw jau shaning na shata hti laika na laban shani de htawt sit da ai.

1960 shaning hta Wa Sarabyin Yawhan XXIII gaw dai poi mying hpe “Feast of the Blessed Virgin Mary of the Rosary” ga baw ginlam n pu hta bang da ai.

1969 shaning hta na nawku dau jau ladaw hpe bai shatsawm ai hta Wa Sarabyin Pawlu VI gaw “Our Lady of the Rosary” poi gaw n galaw n mai myit dum ai poi ngu bai masat da ai.

Rosary hti ai ni hpe Nu Maria ga sadi jaw da ai chyeju ni

1. Ngai hpe kam hpa let Rosary hti ai ni gaw mau hpa kumla hpe mu lu na (Signal graces)
2. Nu Maria a ahkyak la makawp maga ai hte kaba dik chyeju ni hpe hkam la lu na (special protection and the greatest graces)
3. Rosary gaw ngarai wan kaw nna makawp maga ya na; mara hte n kaja ai lam hta na makawp maga ya na; myit shut mang shut ai lam nnga na (powerful armor against hell, it will destroy vice, decrease sin and defeat heresies)
4. Mai kaja magam hpe galaw lu nna wenyi a matu Karai Kasang a matsan dum ai lam law law hpe hkam la lu na; Mungkan ra marit ai lam ni kaw nna makawp maga ya nna, sumsing sut gan hpe ra maring ai lam shalaw ya na; wenyi hpe jasan jaseng ya na.
5. Nu Maria kaw rosary hti ap nawng ai lam n lu ai ngu n nga na.
6. Kam maga n tsawm ai lam galoi mung n hkrum na.
7. Nawku hpung a Sakramentu hpe n hkam la lu ai sha si na n re.
8. Si na aten hta Karai Kasang a nhtoi shingkan hte Shi a chyeju ni hpe hkam la lu na. Si ai hpang san pra ni zawn sumsing mungdan chyeju hpe hkam la lu na.
9. Ngai mung kaji kaw nna shalawt ya na.
10. Rosary hpe kam hpa ai ma ni hpe Sumsing mungdan hta tsaw grau ai shara hpe jaw na.
11. Hpyi mahpyi lu la na.
12. Rosary hpe shalaw jahtam nna garan gachyan ai ni hta ra ai lam hpe jahpring shatsup ya na.
13. Rosary hti akyu hpyi ai ni si ai aten hta Kasha Yesu kaw na htani htana asak hpe lu la na.
14. Rosary hti ai ni gaw Nu Maria a kashu kasha ni rai na hte shi a kasha Yesu Hkristu a kahpu kanau ni tai na.
15. Rosary hti ai ni gaw Karai Kasang tau nau hkyen lajang da ai hte maren byin wa na ra ai.

Ndai chyeju ni hpe jinghpaw ga hte gale da ai hta n hkum tsup ai lam ni mung nga na re majaw hkum tsup hkra gale lu ai shaloi bai mara ya na nngai.

Chyeju kaba sai!

Translated by Fr. Patrick Gawmaw Hkawng Yae

#rvakachinservice

https://en.wikipedia.org/wiki/Our_Lady_of_the_Rosary

https://www.ourladyswarriors.org/prayer/15promise.htm