Rosary a Hkawhkam Jan Nu Maria a Poi Nhtoi (October 7)

Nu Maria hpe Rosary a Hkawhkam Jan ngu nna daini e, shagrau galaw nga ai poi hpe lai wa sai shaning 1571 ning hta, Wa Sarabyin Pius (V) kaw nna masat dat ya sai rai nga ai. Ndai Poi gaw, Lepando shara hta byin ai hka dap majan je ai kaw e, awng padang lu la ai masat dingsat nhtoi rai nga ai. Dai majaw, Hkristian makam masham hpe shamyit shatsai kau maw ai Turk tai hpyen ni hpe, Hkristian hka dep ni awng padang dip kau lu nna, Hkristian makam masham hpe hkye la lu ai majan mung rai nga ai.

Ndai zawn hpyen n-gun ja dik ai hte Hkristian makam masham hpe shamyit kau maw ai Turk amyusha ni a hpyen n-gun hpe, Rosary akyu hpyi ai nna awng dang kau la lu ai rai nga ai.

Rosary akyu hpyi ai lam gaw, grai manu dan lachyum pru tsawm htap dik ai akyu hpyi hkrang langai mi rai nga ai. Ndai Rosary akyu hpyi ai hkrang hpe, Nu Maria hkum nan San Pra ai Dominic kaw sa dan pru let matsun da ai shani kaw nna hpang wa ai rai nga ai. Ave Maria akyu hpyi ga hpe (150) lang tsun akyu hpyi ai gaw, Shakawn Kungdawn daw (150) rai nga ai hpe shadum ya ai lam rai nga ai hpe moi shawng de na laika nchye ai ni gaw nchye madat ya ma ai. Ave Maria akyu hpyi ga a shawng na daw gaw, San Luka ka da ai Kabu Gara Shiga kaw na rai nga ai. (Luka 1:28, 42) Ngam ai daw hpe gaw, Nawku Hpung shajat bang la ai rai nga ai.

Mung sung ga sung (15) hpe mung, Kabu Gara, Yawn Hkyen, Hpung Shingkang Rawng ai Mung Sung Ga Sung nga nna garan da nga ai. Ndai mung sung ni gaw, Madu Yesu hte Nu Maria a sak hkrung ten na mabyin ni, mahkrum madup ni hpe shadum ya na matu rai nga ai. Wa Sarabyin Pawlu (VI) gaw, Rosary akyu hpyi ai shaloi, mung sung ga sung ni hpe n sumru yu ai sha hpyi yang gaw, n sa n lawm ai masha hte bung nga ai, nga nna shadum da nga ai.

Dai hta n-ga, 2002 ning hta, ya n nga mat wa sai, San Pra ai Wa Sarabyin Yawhan Pawlu (II) kaw nna, Nhtoi a Mung Sung Ga Sung rai nga ai, Madu Yesu a hkawmsa lai wa sai hte galaw lai wa sai lam ni hpe myit dum sumru yu ai lam hpe matut jat bang da ya sai rai nga ai. Dai majaw, Nu Maria hpang de Rosary hti akyu hpyi sumru yu ra na, Mung sung ga sung (20) rai nga ai.

Rosary akyu hpyi ai hte kapawn nna Nu Maria hpe shakawn shagrau ai Litany akyu hpyi ga hpe mung, 1592 ning kaw nna shalawm let hpyi hpang wa ga ai re. Ndai Litany shakawn akyu hpyi ga gaw, Loreto mare kaw na Nawku Jawng kaw akyu hpyi hpang ai akyu hpyi shakawn ai lamang rai nga ai. Bai nna, Rosary akyu hpyi daw ni a lapran kaw “Oh Madu Yesu….” Nga ai akyu hpyi ga kadun hpe mung hpyi shalawm ai rai nga ai. Ndai akyu hpyi ga gaw, Nu Maria hkum nan 1917 ning hta Portugal mungdan, Fatima mare kaw ma kaji masum rai nga ai (Lucia, Jacinta hte Francisco) hpe sa dan pru ai shaloi akyu hpyi shalawm na matu, sharin matsun da ya ai akyu hpyi ga nan rai nga ai.

“Rosary akyu hpyi ai shaloi ga ni hpe kahtap tsun ai sha re” nga nna myit ai ni dum chye da ra na lam gaw, shada tsawra myit rawng ai ni gaw, ga ni hpe kade lang kahtap tsun timung n-yit ai sha n-ga, grau arawng la hkat nga ma ai. Rosary akyu hpyi ga gaw, Kanu Maria hte Kasha ni a lapran shada tsawra let shaga hkat ai lam mung rai nga ai.

Lahta de gam garan lai wa sai hte maren, Nu Maria hpang de Rosary hti akyu hpyi ai shaloi, Mung sung ga sung ni hpe atsawm sha myit dum sumru let, hti lu hkra shakut nga ga law.

By;

Rose Angeline Maran Nang Doi (SFX)

RVA-Kachin Service (Myitkyina)