Rosary a Hkaw Hkam jan Nu Maria ( 15 October, 2019 )

Mama Mary

Rosary a Hkaw Hkam jan Nu Maria

           Nu Wa ni, mungkan n’tsa sak hkrung hkawm sa nga ai ni  yawng gaw, kanu kawa lu ai ni hkrai rai nga ga ai. Daini Chyoi pra ai Catholic nawku hpung kawn nna, karai a kanu Chyoi pra ai Nu Maria hpe lak san nawku hkung ga shakawn ai lam ni galaw nga ga ai re. Grau nna, n’dai October shata gaw, Nu Maria hpe nawku hkung ga shakawn ai, anhte yawng chye na da ai Rosary hti ai shata mung rai nga ai. Ndai October shata hta Rosary hti ai lachyum hpe san pra ai Pio  5 kawn nna, shi naw sak hkrung nga ai ten, 1571 ning kawn nna, hpang da sai rai nga ai. Dai ten hta, Lek- Pan:- Ko ngu ai mare kaba a panglai hkrun lam n’tsa na majan hpe masat dingsat tai u ga matu, awng dang ai masat poi rai nga ai. Nu Maria kaw rosary hti kyu hpyi ai a marang e awng dang ai chyeju ni, hkam la lu ai chyeju masat rai nga ai. 

          Bai Rosary a hkaw hkam jan Nu Maria ngu shing teng a’mying la let, shaning shagu shakawn shagrau ai, ya daini du hkra rai nga ai.  Rosary hti kyu hpyi ai a marang e n’myit mada ai lam ni yawng awng dang ai chyeju ni hkam la lu ai hpe nang, ngai anhte  yawng hkam sha lu na ga ai. San seng san pra ai Rosary a hkaw hkam jan Nu Maria hpe kam hpa nawku shakawn ai a majaw, ganing re ai majan pa hta mung hkrat sum ai lam n’nga ai sha awng dang ai chye ju ni hkam la lu nga ai hpe sak se madun da ai lam labau hta mu lu nga ai re. Madu Yesu Hkristu a hkye hkrang la ai magam hta Nu Chyoi Pra ai Maria hkum nan shang lawm garum lai mat wa sai rai nga ai. Shannu a tsawra myit a majaw, daini anhte yawng hpe hkye hkrang la ai chyeju ni jaw ya nga sai re.

           Chyoi Pra ai Nu Maria kaw kam hpa kyu hpyi na matu, Nu Maria hkum nan, San Pra ai Dominic hpe dan pru dan ai shaloi, shi hkum nan, hpaw tsun dan sai rai nga ai. Nu Maria ra sharawng dik a’kyu hpyi ga n’dai ni hpe, Lk laika hta mung, ka da ai hpe mu lu nga ai.  Rosary kyu hpyi ai shaloi mung, mungsung ga sungri ni hte n’htoi masat let kyu hpyi ai rai nga ai. Mungsung ga sungri ni yawng 15 nga ai sha n’ga, n’htoi a mungsung ga ni 5 hpe mung kyi hpyi nga ga ai.

           Ndai mungsung ga sungri ni gaw, Nu Maria hte kasha Yesu a mabyin masa ni hpe hpaw tsun da ai rai nga ai. Shannu a tsawra myit hte pawng nna, anhte mara hta lam dam nga ai shinggyim masha ni hpe hkye hkrang la na matu Nu Maria  hkum nan, kasha yesu a hkye hkrang la ai magam hta shang lawm shakut lai wa sai hpe daini, anhte yawng hkam sha lu nga ga ai rai nga ai.

          Nu Maria hpe kamhpa kyu hpyi Rosary hti ai hpang Nu Maria hpe hkungga nawku shakawn ai, li-ta-ny hpe kyu hpyi shalawm hpang ai gaw, Madu a shaning 1592 ning hta rai nga ai. Italy mungdan a Lo- ret- to ngu ai nawku htingnu kawn nna, lajang da ya sai hpe daini anhte yawng kyu hpyi nga saga ai re. Bai, rosary daw mi hti ngut ai hpang hpyi ai kyu hpyi ga hpe gaw, 1917 ning Fatima mare hta Nu Maria hkum nan dan pru dan ai shaloi  Lucia, Jacinta hte Francisco ni marai masum hpe shi hkum nan sharin ya sai rai nga ai. Dai kyu hpyi ga gaw ngarai kaji kaw nga ai wenyi ni hkye hkrang la hkrum na matu garum hpyi ya ai kyu hpyi ga rai nga ai. Bai Nu Maria hkum nan, dai ma masum hpe Rosary jang sha sum sing mungdan de du lu na re lam mung ga sadi jaw sai rai nga ai. Daini anhte a matu grai nan hpring tsup ai kyu hpyi ga rai nga sai re.

          Nu Wa ni, anhte hpung masha n’kau gaw, shani shagu rosary chyu hti, kyu hpyi ga mung dai hkrai hkrai nga nna, grai lagawn wa sai, grai jin wa sai nga ai ni mung nga na n’hten! Dai kyu hpyi ga hpe sha tsun tsun rai jan wa na re ngu shadu ai ni mung nga na re. daizawn galoi mung dai hkrai sha tsun tsun, kyu hpyi ga laga n’nga sam sai nga nna, myit ai ni hpe shadum mayu ai gaw, ga shadawn, grai tsawra hkat ai yen nga ai ngu gaw, dai grai tsawra hkat ai yen hpe yu yu ga. Shan gaw shani shagu, hkying ten shagu, mu hkrum shagu , tsawra ai yaw nga ai sha tsun na gaw teng sha rai na re. shan a matu tsawra ai ngu ai gaw, galoi mung mat mat na n’re, jin na n’re, nyip mat na n’rai nga ai.

          Nan tsawra hkat ai shada da pi dai ram manu shadan, gahtap nna tsun tsun rai nga ai wa, anhte hpe hkye hkrang la ai Kanu, san seng san pra ai prat hpe jaw ya ai kanu, galoi mung makawp maga ya nga ai kanu, sim sa lam hpe jaw ya nga ai kanu, pawn ba la nga ai kanu, ra ai lam shagu hta garum ya nga ai kanu, myi man n’lata ai kanu, mara hta na hkye la ai kanu, dai ram hpring tsup ai kanau hpe anhte hkyingten shagu tsawra ra na rai nga ai.

           Lai mat wa sai shaning law law ni hta, majan gasat ai ten sum na ri ri re ai ten hta, Nu Maria hpe kam hpa let majan kata Rosary hti kyu hpyi ai a marang e awng dang la lu sai lam ni hpe mungkan labau, makam masham labau, mungdan labau ni hkan mu hti lu nga ai. Nu Wa ni, Chyoi pra Nu Maria gaw, shi hpe kam hpa hpyi nem ai ni hpe gabai da ai lam n’nga, galoi mung garum shingtau chyeju ni hpe jaw nga ai hpe hkam sha lu ai, sak se hkam lu ai ni law law nga na ga ai. Dai majaw, Chyoi pra ai Rosary a a‘tsam chyeju kum hpa hpe, hkam la lu hkra Rosary hti kyu hpyi manoi manat nga let, Nu Chyoi pra ai Maria hpe kam sham Nawku nga ga law.

 

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.

 

Add new comment

1 + 15 =