Roma Mare na San Pra ai Frances a Poi Nhtoi (March 9)

San Pra ai Frances gaw, Roma mare kaw na lusu nna ahkang aya kaba lu ai kanu kawa yan kaw nna shangai wa ai. Shi hpe “Dinghku Num ni a Kasi” nga nna laksan shagrau kumhpa nga ai. Shi gaw, Mama tai mayu ai; raitimung, kanu yan kawa a ga madat nna, shi a asak (13) ning hta Lorenzo Ponziani mying ai la kasha hte kun dinghku de ai. Shan gaw, shan a dinghku prat (40) ning tup shada da tsawra matsan dum ai myit jasat hte sak hkrung nga lai wa ma ai.

San Pra ai Frances gaw, wenyi lam hte seng wa jang kaning re ai baw mung, shi hpe dingbai dingna n jaw lu hkra myit shaja tawn ai; wenyi lam hpe ahkyak madung tawn ai. Shan a kasha marai masum gaw, kanu hte kawa sharin ya ai majaw, kaja ai Hkristan hpaji hte nga kaba wa ma ai.

San Pra ai Frances gaw, myit ru yawn hkyen lam law law hpe hkam lai wa nu ai. Grau nna mung masa hpan law law pru wa ai aten rai nna madu wa gaw, kaga shara de shaden shapraw kau hkrum ai. Shi a kasha John mung n hkru n kaja ai ni e rim mat wa ai hkrum sai. Asak grain aw kaja ai kasha Evangelist hte Agnes yan hpe mung, si kau da ai hkrum ai. Ndai zawn re ai yawn hkyen lam magup hte hkrum timung, Karai Kasang a ntsa shi a kamhpa myit kaba ai majaw lu hkam sharang lai wa sai. Bai nna, shi a kasha John a madu jan rai nga ai, shi a kanam Mobilla mung shi hpe tsawra matsan dum myit, tau chye ya ai myit ni madun ya ai majaw, San Pra ai Frances gaw grai myit awai la lu nu ai.

1425 ning hta, San Pra ai Frances gaw, Karai Kasang hte matsan masha ni matu shawng taw nna yaw shada ai sasana magam gun wuhpung langai mi rai nga ai, “Oblate Congregation of Tor de Specchi” wuhpung hpe de hpang dat sai rai nga ai. Shi a n rum n tau wa  n nga mat ai hpang, shi gaw, Mama tai mat wa sai. Shi de da ai Mama Magam gun wuhpung malawm ni hpe kaja di kai kasi ni madun ya let, sak hkrung nga lai wa sai. Shi a sak hkrung ten hta akyu hpyi shaja ai, ru yak jam jau hkam sharang ai, machyi makaw hkrum ai ni hte matsan mayan re ai ni hpe gawan katsan rai nna aten shama nna nga lai wa sai.

San Pra ai Frances gaw, 1440 ning, March shata (9) ya shani hta, Madu kaw yup pyaw ban sa mat wa sai rai nga ai. Shi a moi mang hpe Roma mare kaw na, “Santa Maria Nuova” Nawku Htingnu kaw makoi mayang da sai rai nga ai. Hpang de dai Nawku Htingnu hpe shi a mying hte galai shamying kau ya ma ai.

Shi n nga mat ai hpang, 1608 ning hta, dai aten na Wa Sarabyin Pawlu (V) kawn shi hpe San Pra ai masha dang dat let, shi a Poi Nhtoi hpe mung, March shata (9) ya shani hta masat shagrau dat ya sai rai nga ai.

Daini Nawku Hpung gaw, Roma Mare na San Pra ai Frances a Poi Nhtoi hpe galaw nga ga ai aten, anhte Hpung Masha ni mung, dinghta ga ntsa asak hkrung nga ai aten, kaning re ai myitru myit kaji lam ni hte hkrum kadup wa ai raitim, hkam jan lu na atsam, Karai Kasang Wa jaw ya rit ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)