Reggio Mare na San Pra ai Saradaw Prosper a Poi Nhtoi (June 25) 25 June 2023

Reggio Mare na San Pra ai Saradaw Prosper a Poi Nhtoi (June 25)

San Pra ai Prosper gaw, Spain Mungdan kaw tsa ban (4) hta shangai wa sai rai nga ai. Raitimung, shi a sak hkrung ten (24) ning tup Italy Mungdan, Reggio Emilia mare kaw na Saradaw lit gun hpai kau da nu ai. Reggio mare masha ni gaw, shi hpe kam shamyet lu dik ai ningbaw nga nna hkap la ma ai.

Shi gaw, Madu Yesu, lusu sahte wa hpe tsun ai Ga Shagawp hte maren, matsan masha ni hpe alak mi yu gawn ai lam hta kasi kamang tai nga ai. Jau tai wa ai hpang Saradaw tai nna, (20) ning jan lit gun hpai kau da ai. Shi a Saradaw ginwang na, Hpung masha ni gaw, Saradaw a matsan masha ni a ntsa tawn ai tsawra myit a majaw, akyu grai hkam la lu ma ai.

A.D (466) ning, June shata (25) ya shani, Saradaw Prosper gaw, Madu kaw yup pyaw ban sa mat wa sai rai nga ai. Shi a hkum tsawp moi mang hpe Shi hkum nan gap kau da ai San Pra ai Apollinaris Nawku Jawng kata kaw lup makoi mayang da ma ai. Shi a chyoi pra ai myit jasat hte shakut sharang ai kasi ni a majaw, shi n nga mat ai shaloi shi a Jau ni grai yawn lai wa ma ai. Reggio mare kaw shi a hpang hkang galai ai Saradaw Thomas gaw, Saradaw Prosper hpe shagrau nna, Saradaw a n rut n ra ni hpe htawt la n htawm, A.D (703) ning hta grai hkyik hkam ai Nawku Jawng langai mi gaw gap let, dai kaw lup makoi mayang da ya wu ai. 

Saradaw Prosper n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, June shata (25) ya shani masat shagrau dat ya sai rai nga ai.

Daini Nawku Hpung gaw, Reggio Mare na San Pra ai Saradaw Prosper a Poi Nhtoi hpe galaw nga ga ai aten hta, anhte a Prat hta mung, kadun la ai dinghta sak prat hta mai kaja ai amu magam ni hpe galaw daw jau let, yawng a matu akyu rawng manu dan ai masha ni byin tai lu hkra shakut sa wa nga ga law.  

By;

Sister Rose Angeline Maran Nang Doi (SFX)

RVA-Kachin Service (Myitkyina)